Nietes modepensa sa iyang bakus batok ‘Mexican knockout artist’
CEBU, Philippines – Ang two-division world champion nga si Donnie ‘Ahas’ Nietes (34-1, 20KOs) makasugat og laing lisud nga away batok ni Mexican Luis ‘Gallo’ Ceja (26-5, 21KOs) sa main event sa Pinoy Pride 30 sa Marso 28 didto sa Mall of Asia Arena.
Si Ceja gihulagway nga adunay kusog nga kumo sa iyang 62 knockout percentage mas daku itandi sa 51 porsiyento ni Nietes.
“Wala pa mi kita sa tapes sa iyang (Ceja) away, pero kusog daw unya labi na nga Mehikano, so dili gyud kakompiyansaan,” matud pa ni ALA chief trainer Edito Villamor.
Si Nietes, kinsa bag-o lang mibuak sa rekord ni anhing Gabriel ‘Flash’ Elorde isip labing dugay nga Filipino world champion, nasayod usab sa kadelikado ni Ceja rason nga sayo siyang nag-ensayo sa ALA Gym.
“Last month nagsugod na og training si Donnie ug plano mi nga mohuman og tulo ka buwan nga training camp. Maka-expect gyud ta og kusog, nya sakto sa condition nga Nietes ani awaya” matud pa ni Villamor.
“Daku ni nga away nako kay gawas nga depensaan nako akong bakus, ako sab ipakita akong abilidad nga andam nako sa possibility nga mosaka og timbang," matud pa sa 32-anyos nga si Nietes.
“Donnie has started training last month because we are planning to have a three-month training camp for this fight so we can expect a strong and very well-conditioned Nietes,” dugang ni Villamor.
Sa laing bahin, ang kanhi five-division world champion nga si Nonito ‘The Filipino Flash’ Donaire Jr. gitakda usab nga moaway sa labing unang higayon dinhi sa nasud sa Pinoy Pride 30 batok sa wala pa matinong kontra. (BANAT NEWS)
- Latest
