KIA nasugamak na sab

CEBU, Philippines - Nasugamak sa ikaduhang sunod-sunod nga higayon ang Kia Carnival  ug ning higayona batok sa Meralco Bolts, 90-80 sa nagpadayong aksiyon sa PBA Commissioner’s Cup kagabii didto sa Cuneta Astrodome.

Ang Meralco mikatay na sa unang dapit sa standing sa ilang 2-0 nga baraha.

Ang 7-foot-3 import sa Kia nga si PJ Ramos  mihimo og laing game-high nga 34 puntos alang sa Kia, apan wala gihapon kini makatabang  pagpadaog sa Carnival kay sama sa una nilang duwa, kulang gihapon siya og suporta gikan sa  mga lokal.

Sa gihapon, ang Kia miduwa nga wala ang ilang playing coach nga si Manny Pacquiao, kinsa atua pa sa Estados Unidos aron sa paghingpit sa iyang sangka batok ni Floyd Mayweather Jr. nga gikatakda sa Mayo 2 didto sa Las Vegas.

Naglabaw og nuybe puntos ang Kia paghuman sa unang 12 minutos sa duwa, 24-15,  apan mao kadto ang katapusang higayon nga nakatilaw sila sa labaw kay  miarangkada ang Meralco aron molansang og 61-48 nga bentaha sa nahabiling 6:45 sa third period.

Si Gary David maoy nangulo sa Bolts sa iyang 25 puntos, samtang ang  import nga si Josh Davis mitampo’g 19 puntos.