Jhundee nagmangtas

CEBU, Philippines – Nagmangtas si Jun ‘Jhundee’ Dejacto  diin mirehistro siya og game-high 30 puntos aron pangulohan ang undermanned nga MSE  batok sa Toyota, 77-67 sa katapusan nilang duwa sa Power Dealer Basketball Club (PDBC) Christmas League 2014 sa miaging Miyerkules diha sa Kimwa gym sa Brgy. Subangdaku, Mandaue City.

Unom lang ka players ang miduwa sa MSE hinungdan nga nakapahungaw sa iyang kainit si Jhundee aron agakon ang koponan ngadto sa kadaugan.

Wala hinuon mag-inusara si Jhundee gumikan kay ang tanan niyang kaubanan parehong nakapuntos. Si John Carlo mipugnit og 16 puntos, gisundan ni Jong Mantalaba nga mitimbre’g 14 puntos, samtang sila si Alvin Castojo, Nido Castojo ug Rene Boysillo nagkumboya’g 17 puntos alang sa MSE nga miarangkada dayon pagsugod aron moposte’g 15-7 paghuman sa unang 10 minutos sa duwa.

Apan ang maong labaw gikalingawan og kitkit sa Toyota ug mihiyos kini ngadto na lang sa dos puntos, 52-54  sa basket ni Mark Miole  sa sayong bahin sa fourth quarter.  Gitubag sab dayon kini ni Jhundee aron inaton pagbalik ang labaw ug wala na milingi pa ang MSE sukad niadto.

Ang Toyota nga wala gyud makatilaw og labaw sa kinatibuk-ang duwa gipangulohan ni Joey Catalan pinaagi sa iyang 21 puntos, lakip na niini ang lima ka three-pointers,  gisundan nilang Joseph Malang ug John Dan Cuanan nga miantog og 12 puntos matag usa.

Ang  liga nga gipaluyohan sa Saymer Merchandise ni PDBC president Florentino Sayson gidumala nilang PDBC founder Arnold de Asis ug Alner Mercado inabagan nilang Eduard Escorial, Marlon Espante  ug Kenneth Tagalog sa VIMBRA.

Puntos Matag Usa

MSE (77) – Jhundee 30, John Carlo 16, Mantalaba 14, Alcast 9, Castojo 6, Boysillo 2.

TOYOTA (67) – Catalan 21, Malang 12, Cuanan 12, Molde 9, Miole 8, Manalili 3, Quintero 2. (BANAT NEWS)