17th Aboitiz Football Cup buksan na karong adlawa
CEBU, Philippines - Usa ka espesyal nga seremonyas sa pagbukas ang pormal nga mosikad sa 17th Aboitiz Football Cup karong alas-4 sa hapon diha sa Cebu City Sports Center.
Mga pinasidunggang dinapit sa maong kalihukan mao sila si Jaime Jose Aboitiz ug Txabi Aboitiz nga pulos Trustee sa Aboitiz Foundation. Si Aboitiz Foundation EVP ug COO Sonny Carpio motambong sab uban nilang AVP for Operations Danny Cerence, manager Jowelle Ann Cruz ug Rechiel Cordova.
Si Cebu City Sports Commission chairman Edward Hayco mobatbat sa welcome address, samtang si Cebu Football Association president Ricky Dakay maoy modeklara sa pagbukas sa torneyo. Si Arantxa Marie Trebol sa Sacred Heart School-Ateneo de Cebu, nga miyembro sa Philippine Under 14 ug 16 Girls teams, maoy mangu sa Oath of Fair Play.
Hinuon ang kompetisyon karong Enero 31 pa sugdan. Gawas sa sports center, lain pang binyu sa mga duwa mao ang SHS-Ateneo de Cebu, Don Bosco Technology Center ug San Roque Parish football fields.
Dul-an ngadto sa 200 ka teams ang mopakita’g aksiyon sa 17 ka mga kategoriya nga naglangkob sa players 6, players 8, players 10, boys 12, girls 12, boys 14,girls 14, boys 17, girls 17, boys 19, boys 23, BPOs, inter-company, ladies open ug men’s open. (BANAT NEWS)
- Latest
