Gumban misakmit sa Phl title
CEBU, Philippines - Usa ka bangis left uppercut ang gipatama ni unbeaten ALA Gym stalwart Melvin ‘Top Gun’ Gumban (19-0, 10KOs) ngadto sa gusok ni Weljan Ugbaniel (13-3, 4KOs) aron masakmit ang bakanteng Philippine super flyweight championship sa main event sa ALA Promotions-Sinulog Boxing Festival sa miaging gabii didto sa Gaisano Countrymall carpark.
Si Gumban mipakita sa iyang kusog ug kapaspas ug gipakita niya nga andam na siya alang sa regional title fight.
Sa kakusog sa iyang suntok, wala dayon ka barog si Ugbaniel kay nagping-it sa kasakit nga maoy nakapaaghat ni referee Ben Necesario paghunong sa away sa oras nga 2:59.
“Kompiyansa gyud ko modaog kay grabe akong training pero wala ko mag-expect nga ingon ato ra kadali,” matud pa sa garbo sa Escalante City.
Sa maong kadaugan si Gumban giplanohan nga moaway alang sa Oriental and Pacific Boxing Federation title.
Sa supporting bout, ang stablemate ni Gumban nga si Elmo ‘Bisdak’ Traya (7-1, 6KOs) mipatumba ni Giovani Rota (7-5, 7KOs) sa sa makaduha ka higayon wala pa niya kini hingpit nga gitapos sa 2:40 sa first round.
Sa undercards, si Vicente Casido midaog pinaagi sa majority decision batok Bryan Samson, si Melvin Jerusalem mi-TKO ni Rez Padrogane sa second round, si Gerald Suico midaog pinaagi sa puntos batok ni Junrex Saldivia.
Gikulata ni Michael Estrella si Jonne Burlado, si Junder Gregorio mipaluhod ni Jesson Horteza ug si Joepher Montano mipa-undang ni Junie Villacrusis sa second round. (BANAT PALARO)
- Latest
