Ali okey na
CEBU, Philippines – Dili magsaulog sa iyang ika-73 adlaw'ng natawhan sa tambalanan si boxing legend Muhammad Ali human siya maulii sa sakit nga UTI.
Si Ali sa panimalay na magtiwas og paalim diin ubanan siya sa iyang kapikas nga si Lonnie didto sa Arizona.
Negosasyon nahugno
Gipahibalo ni Golden Boy Promotions president Oscar De La Hoya nga mihanap ang kahigayunan nga mahitabo ang middleweight super fight tali ni Puerto Rican star Miguel Cotto ug Mexican Saul Alvarez.
Kini human mismo ang kampo ni Cotto ang mibalibad sa away human sila wa kauyon sa detalye atol sa negosasyon.
UFC champ gisilotan
Gipamulta og $25,000 ang reigning Ultimate Fighting Championship light heavyweight king nga si Jon Jones human siya mipositibo nga migamit og illegal nga drugas nga cocaine.
Mapasalamaton hinuon ang kampo sa mixed martial arts star tungod kay wala kini gisuspenso human usab misulod dayun sa rehab ang American star.
Kanhi Cebu Niños point guard mipanaw na
Mitaliwan na ning kalibutana ang kanhi M.Lhuillier Kwarta Padala-Cebu Niños point guard nga si Woodrow Enriquez niadtong Sabado sa edad nga 37-anyos.
Ang kapikas ni Enriquez nga si Catherine uban sa iyang banay mi-anunsiyo sa kamatayon sa Cebuano player tungod sa kidney complications ug bed sores.
Si Enriquez giisip nga usa sa mga ngilngig nga point guards gikan sa Sugbu diin siya nahimong sinaligan sa M.Lhuillier ni legendary coach Raul ‘Yayoy’ Alcoseba nga midominar sa commercial leagues sa Visayas ug Mindanao.
Apan si Enriquez nakahiagum og ngil-ad nga injury atol sa ilang exhibition game batok sa Alaska Aces upat ka tuig ang milabay didto sa University of San Carlos gym.
Si Enriquez daling gidala ngadto sa Chong Hua Hospital diin kanhi nasayran nga adunay bali nga spine rasun sa iyang pagka-paralyze.
Si Enriquez nahimong MVP sa United Regional Basketball League niadtong tuig 2004 ug Liga Pilipinas Conference III niadtong tuig 2009.
Anak usab siya ni kanhi PBA pioneer Alfredo Enriquez kinsa miduwa sa Seven-Up ug Filmanbank niadtong tuig 1975 ngadto sa tuig 1979.
Sa wala pa siya misikat sa commercial leagues, si Woodrow nahimong sinaligan sa Cebu Doctors College nga mikampiyon sa Cebu Amateur Athletic Association nga karon CESAFI niadtong tuig 1999. Ang haya ni Woodrow anaa sa pinuy-anan sa iyang mga ginikanan sa Brgy.Mabolo, ning syudad. (BANAT NEWS)
- Latest
