3rd PICPA Sinulog chessfest gitakda

CEBU, Philippines - Magpalabwanay na sab sa ilang abilidad ang mga tadhan ug beteranong chess players  sa ipahigayong  3rd Philippine Institute of Certified Public Accountants (PICPA)-Cebu Chapter Sinulog Open Chess Tournament nga gikatakda karong Enero 24-25  diha sa Deep Blue 'D Wodpushers Chess Club sa SM City-Cebu.

Sa 10 ka koponan nga gipaabot nga mosalmot, ang Chess Masters nilang NM Merben Roque, Richard Natividad ug Carlo Maraat ug ingon man ang grupo nilang FIDE Master Anthony Makinano, Voltaire Sevillano ug Ronald Ganzon mao karon ang milutaw nga labing lig-on nga kandidato aron molangkat sa kampiyonato.

Dili sab hinuon kabintahaan ang ubang mga entrante ilabi na ang duha ka teams gikan sa Bureau of International Revenue (BIR), ug ingon man ang mga pambato sa Oriental Port and Allied Services Corporation (OPASCOR) ug Visayan Electric Company (VECO).

Ang  tinuig nga torneyo pormal nga gilusad kagahapon nilang PICPA-Cebu Chapter President Ipher Q. Tabañag, tournament chairman Rodrigo Ababat ug FIDE Arbiter Marvin Y. Ruelan.

Gawas sa mga tropeyo, ang makampiyon modawat og P12,000, samtang ang mopahiluna sa ikaduha ug ikatulong puwesto mobulsa’g  P8,000 ug P6,000. Ang mokapyot sa ikaupat nga dapit mobira og P4,000, samtang ang top board players dunay makubra nga P1,000 matag usa.

Ang registration fee nagkantidad og P1,200. Alang sa dugang impormasyon, mahimong motawag ni Tabañag sa 253-2871. (BANAT NEWS)