Hayco mihagit sa Doce Pares alang sa Eskrima record

CEBU, Philippines – Gihagit ni Cebu City Sports Commission (CCSC) chairman Edward Hayco ang dul-an sa usa ka gatos nga eskrimadors nga mitambong sa ika-83rd nga anibersaryo sa Cacoy Doce Pares World Eskrima Federation sa pagmugna og labing dako nga eskrima class aron mahimo kining usa  ka record sa Guinness.

Maoy gihimong pananglitan ni Hayco ang Dance Sports contingents, ang simultaneous chess tournament ug ang archery tournament nga pulos nahilandig sa Guinness Book of World Records.

Matud pa gyud ni Hayco nga ang pagbutang sa Cacoy Doce Pares sa pahina sa Guinness Book of World Records maoy usa sa labing maayong paagi sa pagtamud o pagrehisto ni Supreme Grand Master Ciriaco "Cacoy" Cañete  kinsa maoy giilang usa sa mga orihinal nga nakadiskubre sa eskrima isip matang sa martial arts dinhi sa Sugbo.

Sa maong hagit, ang mga sakop sa Cacoy Doce Pares miyango-yango dihang gipangutana sila kung makahimo ba sila pagporma og 10 mil ka bata nga magdungan og pailawom sa usa ka eskrima class.

Giila ni Hayco si Cañete nga usa ka maayong tawo nga lisud balibaran kung maoy mo-imbitar. Gani dihang gi-email sa iyang apo nga si Chuck Cañete ang imbitasyon isip guest speaker ug inducting officer, mobalibad na unta siya kay gikatakda siyang operahan sa iyang hubag sa wa'ng aping.

Apan duha ka adlaw human sa iyang operasyon, iyang gisugo ang iyang secretary sa pagtawag kang Cacoy aron dawaton ang maong imbitasyon.

Si Hayco miingon atubangan sa mga sakop sa Cacoy Doce Pares nga andam nang mohimo'g martial arts demo nga "even if he was riding in a wheelchair, he would go to Doce Pares to be the guest speaker of the event and the inducting officer. (BANAT NEWS)