Beermen, Aces buk-anay sa baraha

CEBU, Philippines - Human sa duguong  duwa sa Game-2, laing  pisikal nga sangka ang gipaabot nga mahitabo sa duha ka magkaribal -- San Miguel Beermen ug Alaska Aces sa Game-3 sa ilang “best-of-seven” finals series sa PBA Philippine Cup karong  adlawa didto sa Smart Araneta Coliseum.

Sugdan ang krusyal nga duwa sa alas-5 sa hapon.

Ang Aces unang nakabentaha sa series human midaog pinaagi sa overtime, 88-82 niadtong Miyerkules, apan  ang Beermen mibawos sa Game-2, 100-86 aron patas ang  serye,  1-1.  

Nahimong interesante ang Game-2 tungod sa ka pisikal sa duwa nga miresulta sa pipila ka mga injury ug diriyot  pa maglamok-lamok. Tungod  niini, si PBA Commissioner Chito Salud napugos sa pagpatawag sa mga players sama nila ni Arwind Santos sa Beermen ug  Calvin Abueva sa Aces nga hapit magsinumbagay.  Gipatawag sab  sila si David Semerad ug Ronald Tubid sa San Miguel ug Dondon Hontiveros ug Vic Manuel sa Alaska. (BANAT NEWS)