Del Prado pabilin gihapon isip PTA-7 Chief
CEBU, Philippines – Sa ikaunom ka sunod-sunod nga tuig, ang sportsman nga si Tony del Prado magpabilin gihapon isip tsirman sa Philippine Taekwondo Association (PTA) Region VII.
Sa gihimong secret balloting, si Del Prado nakakuha og labing daghan nga botos aron mangu pag-usab sa grupo.
Ang tanang sakop sa board nga naggikan sa Sugbo naglakip nilang Hilarion Elpa, Avenger Alob, Danny Yap, Glenn Lava, Raul Luna ug Grace Arnibal.
Si Lava mao lang ang aktibong niduwa. Gilakip siya sa board tungod sa pagkaplag ug pag-ani og world-class athletes sama nilang Mikaela Calamba ug Rinna Babanto ug uban pa.
Sa iyang ulahing termino, si Del Prado miingon nga dili lang siya mosentro sa technical side sa paugnat sa kusog, apan lakip na usab sa pagpalambo sa umaabot nga mga lider.
Gawas pa niana, ang PTA-7 motapok sab sa tanang potential jins sa poomsae ug sparring. Ang selection process sugdan sunod bulan. Ang inisyal nga plano mao ang paghagpat sa Top 20 diin bairon ang ilang abilidad ubos sa Cebu-based elite coaches. Ang mga piniling pool of talents hatagan sab og leadership roles kay sila ang umaabot nga Cebu taekwondo. Sumala pa ni Del Prado nga ila unya i-promote ang Philippine Taekwondo League- Cebu. Ang torneyo mosubay og tag team format. “We will also strenghten our Phil Taekwondo League-Cebu by encouraging more teams to participate. This is a school-based league which runs from August to November and is held at SM Consolacion," matud pa ni Del Prado. (BANAT NEWS)
- Latest
