Cebu Blue Marlins nagpanikad na

CEBU, Philippines – Ang Cebu Blue Marlins (CBM) Swim Club nagpanikad alang sa ilang pagsalmot og lima ka torneyo sud lang sa unang kuwarter ning tuiga.
Human sa duha ka tuig nga pagpalta, ang CBM nga gipangulohan ni coach Rolando Alvarez mobalik sa aksiyon sa Iloilo  Dinagyang Invitational Age-Group  Swim Meet sa Iloilo City sa Enero 23-24.
Si Alvarez mopadala og 30 ka entrante diin kasagaran niini ang iyang mga batos gikan sa University of Cebu (UC).
Gawas sa Iloilo, ang CBM nangandam usab alang sa Central Visayas Regional Athletic Association (CVIRAA) Meet ug sa Private Schools Athletic Association (PRISAA) Regional Games nga pulos  gikatakda sunod sa bulan.
Gihangop sab sa CBM ang imbitasyon gikan sa Cebu International School aron mosalmot sa ilang invitational swim meet sa Pebrero 14.
Ang CBM mao sab ang gitahasan sa pagpahigayon sa 1st Mayor Michael Rama Cup Invitational Age-Group Swim Meet  diha sa Cebu  City Sports Center nga tentatibong gitakda sa Pebrero 28 hangtod sa Marso 1. (BANAT NEWS)