Anotado No. 1 scorer sa UAAP football

MANILA, Philippines - Si Steven Anotado ng UST ang siyang lumabas bilang top scorer sa UAAP Season 77 men’s football.

May anim na goals na ang ginawa ng striker ng UST at tampok dito ang hat-trick na ginawa nang angkinin ng Golden Booters ang 3-0 panalo laban sa UE bago nagbakasyon ang liga para iselebra ang Kapaskuhan at Bagong Taon.

Lalalabas na ang 18-anyos na si Anotado ay umiskor sa apat sa limang larong hinarap ng koponan.

May tig-isang goal siya sa laro laban sa nagdedepensang kampeon FEU Tamaraws, Ateneo Eagles at Adamson Falcons.

Hindi siya nakagawa nang hinarap ang UP Maroons na nanalo sa 2-0 iskor.

Kapos ng dalawang goals para tumabla sa unang puwesto sina Eric Giganto ng FEU at Jinggoy Valmayor ng UP na may tig-apat na goals.

May tatlong goals naman sina Jean Mari Clarino ng UST, Gelo Diamante ng La Salle, Carlo Liay ng Ateneo at Paolo Salengan ng Natiohal University Bulldogs.

Ang UP ang nangunguna sa kompetisyon taglay ang 10 puntos. Sila rin ang may pinakamaraming goals na naiskor sa 12 habang ang UST ay may 11 at ang Ateneo, La Salle at FEU ay may tig-10.