Doce pares election

CEBU, Philippines –  Gikatakda na sab nga pilion sa mga miyembro sa Cacoy  Doce Pares World Eskrima Federation  si Supreme Grand Master Ciriaco ‘Cacoy’ Cañete isip presidente sa maong club atol sa tinuig nga piniliay karong alas-6 sa gabii diha sa ilang headquarters sa dalan C. Padilla, ning dakbayan.
Ang 95-anyos nga si Cañete daan nang gitudlo nga mahimong lifetime president sa Doce Pares sukad siya mipuli sa iyang maguwang nga si Eulogio ‘Yoling’ Cañete, kinsa namatay niadtong tuig 1987.
Sa ika-27 nga sagunsong higayon, si Cañete maoy giilang pangu sa maong  grupo, ang usa sa labing inilang arnis club sa tibuok nasud.
Bugtong ang posisyon lang ni Cacoy ang kanunay ‘status quo’ ug dili mahilabtan, samtang ang ubang opisyales gikan sa bise presidente hangtod sa ubos nga posisyon pilian  matag tuig nga kasarangang huptan sa mga sakop sa pamilya ni Cacoy ug sa uban niyang mga sinaligan.     

Ang anak ni Cacoy nga si Dennis Cañete, kinsa maoy bise presidente nagkanayon nga ang mga mapili karong gabhiona, manumpa unya sa ikaduhang semana sa Enero  sunod tuig atol sa ika-83 nga anibersaryo sa Doce Pares nga tambongan sa mga langyaw’ng eskrimador nga mga tinun-an ni Cacoy.  
Human sa anibersaryo, ang uban mga langyaw’ng eskrimador mopailawom pag-usab og training isip refresher course. (BANAT NEWS)