Alaska nagkaduol na sa finals

CEBU, Philippines – Usa na lang ka daog, mobalik na sab sa finals  ang Alaska Aces  human sa ilang 93-88 nga kadaugan batok sa Rain or Shine Elasto Painters  sa Game-5 sa “best-of-seven” semifinals series sa PBA Philippine Cup kagabii didto sa Mall of Asia Arena.
Ang Alaska naglabaw na karon sa serye, 3-2 
Gibiyaan  og 11 puntos ang Alaska, 18-29 sa first period, apan mi-rally kini sa second half  aron makontrolar ang duwa  ug  ingon moposte’g 76-67 nga bentaha sa  third period.
Si Calvin Abueva, kinsa nakalingkawas og suspensyon  human sa iyang flagrant foul sa Game-4, maoy nangulo sa Alaska sa iyang 16 puntos ug 11 ka rebounds, samtang si Cyrus Baguio mihimo sab og 16 puntos.
Ang rookie sa Painters nga si Raymund Almazan maoy nangulo sa koponan sa iya sab nga 16 puntos, samtang ang sinaligang scorer sa Rain or Shine nga si Paul Lee  nalimitahan  lang og 14 puntos.    Ang modaog tali sa Alaska ug Rain or Shine maoy mosangka sa nagpaabot nga San Miguel Beermen sa finals. (BANAT NEWS)