Josh Smith mibalhin sa Houstons

CEBU, Philippines - Gitugtan si Josh Smith nga mopahawa gikan sa Detroit Pistons  ngadto sa Houston Rockets, sumala pa sa uwahing kalamboan sa NBA kagahapon.

Usa ka wala magpailang tinubdan ang mitug-an sa The Associated Press tungod kay wala pa mapirmahe ni Smith ang iyang waiver.

Ang Pistons mitugot kang Smith nga mohawa niining semanaha human siya makapirma og upat ka tuig nga kontrata niadtong Hulyo 2013 nga nagkantidad og $54 million.

Si Smith nga usa ka small forward, nag-average og 15.4 points ug 7.8 rebounds atol sa iyang 11 ka tuig sa iyang career.         Karon nga season,  nag-average siya’g 13.1 points ug 7.2 rebounds sud sa 28 ka duwa.

Nag-average sab siya'g  4.7 assists, 1.3 steals ug 1.7 blocks per game karon nga season.

Ang maong lakang maghiusa kang Smith ug sa iyang teammate sa AAU nga si Dwight Howard, kinsa anaa na sa iyang ikaduhang season didto sa Houston.

Daku’g ikatabang si Smith tungod kay wala pa makaduwa alang sa Rockets si Terrence Jones tungod sa naghubag niyang wa'ng tuhod.

Ang 6-foot-9  ug 225-pound nga si Smith maoy 17th overall pick sa Atlanta Hawks niadtong 2004. Nakaduwa siya'g siyam ka season uban sa Hawks diin nag-average siya’g 15.3 points ug walo ka rebounds sa wala pa siya mobalhin didto sa  Pistons.

Ang Rockets, kinsa adunay 20-7 nga baraha, maoy No. 2 sa Southwest Division. (BANAT NEWS)