Grizzlies midaog gyud sa Spurs

CEBU, Philippines - Midaog gyud ang Memphis Grizzlies  batok sa defending champion San Antonio  Spurs human sa triple overtime, 117-116 sa kulbahinam nilang duwa sa National Basketball Association kagahapon didto sa AT&T Center sa San Antonio, Texas.

Dili tiaw nga paningkamot  ang  gihimo sa  Grizzlies aron molampos pagpukan sa Spurs.

Pildihunon na unta ang Grizzlies pipila ka segundos ang nahibilin sa regulation ug ingon man  sa first ug  third overtimes, apan nagpakita sila sa ilang katakus aron putlon ang ilang 10-game losing streak didto sa San Antonio.

Katapusang higayon nga midaog ang Memphis didto sa AT&T Center niadto pang 2011 dihang ilang giharos ang first round sa playoffs.

Si Marc Gasol maoy nangu sa Grizzleis pinaagi sa iyang 26 puntos nga naglakip sa usa ka  three-pointer  dungan sa paghuni sa buzzer atol sa regulation period.  SiZach Randolph midugang og 21 puntos  uban ang 21 ka rebounds alang sa Grizzlies.

Mihimo sab og season-high 18 puntos si Vince Carter alang sa Memphis, kinsa naghupot na karon og  21-4 nga kartada.  Ang Grizzlies bag-o lang sab midaog dihang ilang giputol ang 16-game winning streak sa Golden State Warriors niadtong Martes.

Wala makaduwa alang sa Spurs ang ilang mga starters nga silang Tony Parker ug Kawhi Leonard.

Si Danny Green maoy nangu sa Spurs human siya moposa’g 25 puntos, samtang si Tim  Duncan miabuno’g 23 puntos, kansang jumpshot maoy naghatod sa duwa ngadto sa ikatulong overtime. Gawas sa puntos, si Duncan milangkat sab og 16 ka rebounds. Laing beterano nga si Manu Ginobili miamot og 21 puntos.  

Ang Spurs mihimo  og season-high 17  ka three-pointers, apan igo lang sab sila mihimo’g 13 for 27  sa free throws nga naglaklip sa 5 of 15 ni Duncan, kinsa maoy nakatabla sa duwa, 111-all aron ihatod ang duwa ngadto sa ikatulong overtime.

Ang ikalimang three-pointer ni Green maoy naghatag sa Spurs og 92-89 nga abante sa nahabiling 2.5 segundos sa regulation, apan gitabla kini ni Gasol sa iya sab nga three-pointer atol sa paghuni sa buzzer.

Si Gasol sab maoy nagtabla sa duwa,  102-all pinaagi sa iyang lay-up sa katapusang 9.3  oras aron ihatod ang duwa ngadto sa first overtime.

Sa lain pang mga duwa, gilubong  sa  Utah Jazz ang Miami Heat sa iskor nga 105-87,  ang Phoenix Suns mipakaging  sa Charlotte Hornets, 111-106, ang Boston Celtics  mipukan sa  Orlando Magic, 109-92.

Ang Dallas Mavericks milubong sab sa Detroit Pistons, 117-106, midaog ang Toronto Raptors batok sa Brooklyn Nets, 106-89,  ang Portland TrailBlazers mipukan sa Milwaukee Bucks, 104-97, ang Houston Rockets nakaipsot  sa Denver Nuggets, 115-111 ug ang  L.A. Clippers  daog sa Indiana Pacers, 102-100. (BANAT PALARO)