Toyota midumbol sa Flying V sa PDBC League
CEBU, Philippines – Miratsada og 16 puntos si Christian Parker aron pangulohan ang Toyota nga moiskor sa ilang ikaduhang daog, ning higayona batok sa Flying V, 66-58 sa Power Dealer Basketball Club (PDBC) Christmas League 2014 niadtong Miyerkules diha sa Kimwa gym sa Brgy. Subangdaku, Mandaue City.
Gidominar sa undermanned nga Flying V ang unang duha ka kuwarter diin mitubil sila og 10 puntos nga labaw, 34-24 sa halftime. Apan kalit lang mibalitok ang dagan sa duwa pabor ngadto sa Toyota human ang naulahi giregalohan og 18 puntos tungod kay unom ka players sa Flying V ang wala motunga. Gumikan niini, ang Toyota mao na ang miabante, 42-34 sa third quarter ug sukad niadto naglisud na pagrekober ang naghangak nga Flying V nga gipangulohan ni Tony Tanyag sa iyang 17 puntos.
Misamot ang kalbaryo sa Flying V dihang usa sa ilang mga sinaligan nga si Adonis Obiña na-injured sa hinapos nga bahin sa third period. Si Obiña mitapos sa duwa uban ang otso puntos.
Gawas ni Tanyag, sila si Manzo ug El-El Bolz miiskor sab og double figures sa ilang 13 ug 10 puntos matag usa.
Gisuportahan sa Saymer Merchandise ni PDBC president Florentino Sayson, ang mga duwa gidumala nilang PDBC founder Arnold de Asis ug league organizer Alner Mercado uban nilang Victor Tejero, Edward Escorial, Noel Calo ug Yanie Apas sa VIMBRA.
Puntos Matag Usa
TOYOTA (66) – C. Parker 16, Fortaliza 8, Miole 8, M. Parker 8, Molde 6, Santillan 6, Cuanan 4, Malang 4, Manalili 4.
FLYING V (58) – Tanyag 17, Manzo 13, Bolz 10, A. Obiña 8, Timkang 6, Bolabola 2, J. Obiña 2. (BANAT NEWS)
- Latest
