Bulldog batok alit’z sa Sunday.Com finals

CEBU, Philippines – Natuman gyud ang pangandoy sa Bulldog nga mahimong No. 2 team dihang midaog sila batok sa Dota, 69-58 pagtapos sa elimination round sa Sunday.Com Basketball Club Christmas League 2014 niadtong Domingo diha sa Ibabao-Estancia gym, dakbayan sa Mandaue.

Segun sa lagda sa liga, ang top two teams inig human sa eliminasyon maoy moduwa sa kampiyonato. Busa, ang Bulldog maoy nakaangkon og katungod nga mobugno sa walay pildeng Alit’z, kinsa midaog sab batok sa Astroboy, 54-46.

Ang Alit’z nagbitbit og 5-0 nga baraha, samtang ang Bulldog nagtangag og 3-2 record uban sa Astroboy, apan ang Bulldog maoy nakaingkit sa katapusang lingkoranan sa finals  gumikan  ila man napilde ang Astroboy.

Sa gilauman, si Diosdado Apa Jr. maoy nangu sa Bulldog nga mikabkab og 22 puntos, ang presidente sa Sunday.Com nga si Tata Nadera mikadlit og 10 puntos.

Labaw og 19 puntos ang Bulldog sa halftime, 46-27, apan mihiyos kini ngadto na lang sa sayes puntos, 59-53 sa nahabiling 4:05 sa final period dihang misalida og maayo si Rufiel Palabay.

Ang Dota misuway unta’g ilog sa labaw, apan napakyas kini kay nahutdan sila sa oras.

Si Palabay maoy nangu sa Dota pinaagi sa iyang 16 puntos, gisundan nilang Christopher Cabahug ug  Rolly Mascariñas nga adunay 12 puntos matag usa.

Sa laing bahin, ang Alit’z nagpauwan og pito ka three-pointers aron mapukan ang Astroboy sa ilang non-bearing game ubos sa pagpangulo ni Roberto Neri, kinsa mipabuto’g 22 puntos, lakip na ang tulo ka triples, samtang si Ritchie Malahos mitampo’g 10 puntos.

Gipangulohan sab ni Francis Maucesa ang natagak nga Astroboy human moiskor og 13 puntos, samtang si Jonathan Cortes miamot og 11 puntos.

Nakalabaw unta ang Astroboy, 26-23 sa katapusang uno minuto sa second period, apan si Macmac Nadera mipasud sa iyang three-pointer aron matabla ang iskor, 26-all sa nahabiling 40 segundos sa maong kuwarter.

Gisugdan sa Alit’z ang third period pinaagi sa sunod-sunod nga three-point shot nilang Malahos ug Neri aron inaton ang labaw hangtod nga naangkon ang kadaugan.

Sa pasiunang duwa, ang Mustang midaog batok sa Minions sa laing non-bearing game, 55-35 sa pagpangulo ni Joel Sayson, kinsa mikulit og 15 puntos.

Sila si Ray Niez, Wendell del Castillo, Edward Pepito ug Noel Antigua parehong miiskor og 10 puntos sa maong kadaugan.

Tulo ka players sa Minions ang mihimo’g double figures nga gipangulohan ni Rene Seno sa iyang 14 puntos. Si Momie Irojo mipugnit og 12 puntos, gisundan ni Frankie Corilla sa iyang 11 puntos.

Ang liga gipaluyohan sa Visayan Electric Co. (VECO) ug sa International Pharmaceuticals Inc. (IPI) ug ingon man ni Engr. Rey Gallego.

Ang mga duwa gidumala ni Tata Nadera uban nilang Randy ‘Boboy’ Zanoria, Corceno Baguio Jr. ug Ian A rmero.

Puntos Matag Usa

BULLDOG (69) – Apa Jr. 22, Nadera 10, Casals 9, Antigua 8, Ouano 6, Llenes 6, Cabello 4, Gulbin 2, Ygot 2.

DOTA (58)  – Palabay 16, Cabahug 12, Mascariñas 12, Jacobe 9, Padin 7, Bejasa 2.

Ikaduhang duwa:

ALIT’Z (54) – Neri 22, Malahos 10, G. Antigua 7, Nadera 5, Grafe 4, D. Antigua 4, Del Castillo 2.

ASTROBOY (46) – Maucesa 13, Cortes 11, Ancajas 8, Gahi 7, Mendoza 5. (BANAT NEWS)