Einstein School midaog na sab

CEBU, Philippines – Midaog ba sab ang Einstein School for Kids Mighty Geeks sa ilang ikaduhang pagbagat batok sa Vice-Mayor's Office team ni Atty. Edgardo Labella, Jr. pinaagi sa pag-iskor og 78-72 nga kadaugan alang sa 2-0 record kaniadtong Sabado sa gabii sa lain na sab nga exhibition game didto sa City Sports Club gym sa Cebu Business Park sa Ayala.

Ang Mighty Geeks gipangulohan ni Bureau of Customs (BOC) Chief of Paincargo Warehouse Assessment Division Francisco "Bingo" Matugas,Jr. kinsa mibahug og 29 puntos lakip ang siyam ka three-pointers ug siya maoy bugtong player sa ilang team nga makahimo'g double figures.

Ang laing mga pambato alang sa Mighty Geeks mao ang father and son tandem nilang Roque ug Kirk Amores kinsa nagkumboya og 14 puntos.

Maoy sunod nga puntariya sa Mighty Geeks nga makigsangka sa laing exhibition game sa team gikan sa Integrated Bar of the Philippines (IBP) ni kanhi University of Cebu skipper Kenneth Kernn Sesante sa sunod semana. Si Sesante usa sa mga opisyales ni Matugas sa dihang didto pa siya madestino isip Collector for the Mactan-Cebu International Airport Authority (MCIAA) sa wala pa siya ibalhin didto sa Ninoy Aquino International Airport (NAIA) sa miaging tuig.

Si Matugas, anak ni Surigao City Congressman Francisco, Sr.(Lalo Matugas) nga kanhi sab District Collector dinhi sa Port of Cebu, miburak og 42 puntos uban sa 12 ka three-pointers dihang una nilang gipilde ang Vice-Mayor's team ni Labella kaniadtong Nobiyembre 14 sa iskor, 104-93 didto sa Capitol Parish gym.

Si Ed JP Labella miposa og 10 puntos aron pangulohan ang iyang team uban sa laing duka ka teammates nga mi-iskor sab og 10 puntos nga silang Aton ug Jungoy.

Ang exhibition game tali sa Mighty Geeks ug sa Vice Mayor's Office gihimo isip usa ka paagi aron pag-promote sa bag-o lang natukod nga Einstein School for Kids nga tua mahimutang sa Lapu-Lapu City nga aduna nay kapin sa dos mil ka mga bata nga nagtungha didto.

Puntos matag usa:

Einstein School (78) — Matugas 29, R. Amores 9, Monsanto 6, Almar 6, K. Amores 5, Romero 5, Dela Torre 4, Gandionco 4, Avila 4.

Vice-Mayor's Office (72)—   Labella 10, Aton 10, Jungoy 10, Giron 8, Castaneda 8, Nellas 7, Ceballos 5, Patalinghug 5, Ababon 5, Abelarde 4. (BANAT NEWS)