Beermen sud na sa semifinals
CEBU, Philippines – Mipabuhagay og 18 puntos si Ronald Tubid sa San Miguel Beermen nga milubong sa Blackwater Elite, 91-62 aron moabante sa semifinals sa 2014 PBA Philippine Cup kagabii didto sa Cuneta Astrodome.
Sa maong kadaugan, ang Beermen nagbitbit na karon og 9-2 win-loss record ug mihatag kanila og automatic semifinals slot uban sa Rain or Shine Elasto Painters.
Ang Beermen ug Painters magpaabot na lang sa duha ka koponan nga modaog sa quarterfinals.
Si Sol Mercado mitampo og 15 puntos, samtang ang reigning PBA MVP nga si Junemar Fajardo miamot og 14 puntos uban ang siyam ka rebounds.
Nakalahutay pa ang Blackwater sa first period diin gibiyaan lang sila og sayes puntos, apan wala na nila mapugngi pa ang mas tag-as ug mas beteranong players sa Beermen sa mga misunod nga mga kuwarter.
Gikan sa 25 puntos nga labaw paingon sa second half, ang Beermen mikontrolar sa dakung labaw hangtod sa pagsugod sa final period diin milabaw sila, 70-45.
Sa laing bahin, ang Purefoods Star Hotshots mitapos sa elimination round uban ang daog batok sa Barako Bull Energy Cola, 99-83.
Ang Purefoods mipalambo sa ilang rekord ngadto sa 6-5 win-loss record ug nahimutang sa ikaunom nga dapit sa standing.
Nangulo sa Hotshots mao si Peter Jun Simon sa iyang 16 puntos, samtang si Joe Devance mitampo’g 12 puntos. (BANAT NEWS)
- Latest
