Seno, Alferez nagsawo sa dungog sa Cebuana Lhuillier netfest
CEBU, Philippines – Dili lang usa, kun dili duha ka titulo ang nasakmit nila ni Jan Godfrey Seno ug Zethley Mae Alferez sa susamang age group ug batok gihapon sa susamang kaatbang sa pagtapos sa 2014 Cebuana Lhuillier Age-Group Tennis Championships-Cebu leg niadtong Domingo didto sa City Green Tennis Resort sa Barangay Punta Princesa, ning siyudad.
Si Seno miunay og pilde sa iyang suod nga higala nga si Christopher Encarnacion sa straight sets, 6-2, 7-5 aron masakmit ang boys 16 titles. Gipilde sab ni Seno si Encarnacion, 6-1, 6-0 sa boys 18 finals.
Sama ni Seno, si Alferez misakiyo sab og duha ka titulo pinaagi sa girls 16 ug 19 categories batok ni Shane Villareal.
Sa laing bahin, ang managsuong Cesar Kristofer ug Kristine Renee Salimbangon nagmalampuson sab sa ilang kampanya. Si Cesar Kristofer milangkat sa korona sa unisex 10-under human gipilde si Rupert Orhell Tortal, 4-0, 4-2, apan ang iyang igsuon nga si Kristine Renee, nalandig sa ikaduha sa girls 14 human miyukbo ngadto ni Elizabeth Abarquez, 7-5, 4-6, 11-9.
Laing nidaog og bulawan, mao si Venz Alforque nga naghari sa boys 12 class human giugbok si Klein Cañete, 6-1, 6-1, samtang si Lyra Mae Repollo nidominar sa girls 12 class batok ni Phel Hazel Coderos, 6-2, 6-3.
Si Jose Maria Pague sa Sibugay, Zamboanga nidaog sab batok sa Sugbuanong si Francis Hidalgo, 6-2, 6-3 sa boys 14-under finals. (BANAT NEWS)
- Latest
