Nelson Asaytono nangutana nganong wala man ko apila?

CEBU, Philippines – Gikan sa napiling 25 PBA Greatest Players niadtong tuig 2000, mahimo na kining 40 Greatest PBA player ug madugangan kini'g 15 ka players.

Apan dili sama kaniadto nga ang napili tinuoray gyud nga "great"  ug gani wala gyu'y kisaw human sila mapili nga naglakip sa atong garbo dinhi sa Sugbo nga si Ramon "El Presidente" Fernandez, ang four-time PBA MVP nga lumad sa Maasin City, Southern Leyte.

Lakip sa napili ngadto sa 40 greatest mao silang Danny Ildefonso, Willie Miller ug James Yap kinsa maoy nangu sa 15 ka players nga madugang ngadto sa Elite 25 players aron mokumpleto ngadto sa 40 ka Greatest Players sa kasaysayan sa PBA.

Silang  lldefonso, Miller ug Yap parehong mga two-time MVPs ug sila maoy mangu sa listahan sa 15 ka players---walo kanila ang Pinoy ug pito ang mga Fil-Ams.

Ang mga bag-ong napili nga giaprubahan sa special nomination committee nga gipangulohan nilang kanhi senador ug parehong legends Robert Jaworski ug Freddie Webb isip co-chairmen. Si Jawo (Big J, Sonny) may dugong German ug si Webb may dugong Amerikano apan mas Pilipino pa sila sa uban natong kaigsuonan nga nagpaka-aron ingnon nga Pilipino ug ang ilang pagkapili  nga senador sa atong nasud nga usa sa qualification aron ka mahimong usa ka public official, nagpasabot nga gihangop sila sa mga Pinoy.

Nalakip sa listahan mao ang mga kanhi MVPs  nga silang Asi Taulava, Eric Menk, Kelly Williams, Jayjay Helterbrand, Jimmy Alapag, Mark Caguioa ug Arwind Santos ug silang Jayson Castro, Marc Pingris, Kerby Raymundo, Chito Loyzaga ug Marlou Aquino kinsa maoy mikumpleto sa  dugang 15 ka players.

Ang nomination committee naglakip sab kanilang PBA chairman Patrick Gregorio, vice chairman Robert Non, Rep. Elpidio Barzaga kinsa maoy chairman sa Games and Amusements Committee sa House of Representatives ug mediamen nga silang Joaquin Henson ug Barry Pascua kinsa mituki sa maong listahan sulod sa duha ka oras kaniadtong Lunes.

Giputlan dayon ang listahan human awtomatik nalakip ang MVP winners apan wala nila apila si June Mar Fajardo kinsa tulo pa lang ka tuig sa PBA.

Ang unang napili isip 25 greatest mao sila si Jaworski, Ramon Fernandez, Alvin Patrimonio, Bogs Adornado, Abet Guidaben, Benjie Paras, Atoy Co, Freddie Hubalde, Philip Cezar, Ricky Brown, Johnny Abarrientos, Ato Agustin, Francis Arnaiz, Allan Caidic, Hector Calma, Jerry Codinera, Kenneth Duremdes, Bernie Fabiosa, Danny Florencio, Jojo Lastimosa, Lim Eng Beng, Samboy Lim, Ronnie Magsanoc, Vergel Meneses ug Manny Paner.

Atol sa ika-40 nga anibersaryo sa PBA sunod tuig, pasidunggan ang tanang 40 ka players unya sa Abril 2015.

Ang wala malakip sa listahan mao si Nelson "The Bull" Asaytono ang kanhi power forward sa San Miguel Beermen. Nagnakayon si Asaytono nga dako kaayong tinonto ang pagpili tungod kay sa iyang 17 ka tuig sa PBA, lima ka nominasyon pagka-MVP ang iyang nadawat nga sa iyang pagtuo, igo nang makapakumbensir ang iyang statistics nga malakip unta sa listahan.

Kaniadto wala mo-react si Asaytono tungod kay na-anad na kuno siya nga pirmeng laktawan apan iyang nakita karon nga tuyo siyang gilaktawan.

Niadtong 1992, gi-snub siya isip MVP dihang nalabwan siya ni Ato Agustin ug niadtong 2000, wala sab siya malakip sa 25 Greatest.

Apil sa wala malakip sa listahan mao silang Danny Seigle, Abe King, Arnie Tuadles, Olsen Racela, Bong Hawkins, Jeff Cariaso ug Dennis Espino. Apan ang mas sakit kay wala gani malakip sa lista ang ngan ni Asaytono, ang garbo sa San Teodoro, Oriental Mindoro.

Dako gyud kaayong tinonto ang pag-snub kaniya matud pa ni Asaytono ug gani naghuna-huna pa ang PBA nga usbon ang listahan kay murag nakaamgo sila sa ilang sayop. (BANAT NEWS)