Spurs sango sa Nets
CEBU, Philippines - Mihimo’g season-high 26 puntos si Mirza Teletovic ug career-high 15 ka rebounds aron tabangan ang Brooklyn Nets nga moiskor og daog batok sa defending champion San Antonio Spurs pinaagi sa overtime sa ilang duwa sa NBA kagahapon didto sa Barclays Center sa New York City.
Si Teletovic maoy gihimong starter hulip kang Kevin Garnett, Giusab sa Nets ang ilang estilo atol sa overtime human nila usiki ang ilang 14 puntos nga labaw sa katapusang singko minutos sa regulasyon aron ilang maputol ang winning streak sa Spurs.
Wala makahuygo ang Spurs halos sa kinatibuk-ang duwa ug nabiyaan pa gani sila’g 14 puntos, 68-82. Apan milusad sila og 15-2 run aron tablahon ang duwa 88-all sa nahabiling 2.4 segundos sa regulasyon human sa three-point shot ni Danny Green.
Mibawos sab og tres si Deron Williams alang sa unang basket sa Nets sa overtime period ug gikan niadto sila ang kanunay naglabaw.
Si Green maoy nangu sa Spurs sa iyang 20 puntos uban ang 10 ka rebounds. Si Tim Duncan midugang og 14 puntos ug 17 ka rebounds.
Gisugdan sa Nets ang third quarter og 22-5 run nga naglakip og upat ka three-pointers –duha kang Teletovic ug laing duha gikan sa ilang rookie nga si Bojan Bogdanovic aron molabaw og daku sa iskor nga 62-47.
Si Teletovic daan nang nakapundo og 13 puntos ug 10 ka rebounds sa halftime nga maoy unang player sa Nets nga nakahimo’g double-double sa halftime karon nga season.
Sa laing mga duwa, midaog na gyud ang Philadelphia Sixers aron makalikay nga mahimong worst team sa NBA pinaagi sa ilang 85-77 nga kadaugan batok sa Minnesota Timberwolves, midaog sab ang Boston Celtics batok sa Detroit Pistons pinaagi sa overtime, 109-102.
Ang Washington Wizards milubong sa Los Angeles Lakers, 111-95, ang Chicago Bulls misungag sa Charlotte Hornets, 102-95, gipakuratan sa Atlanta Hawks ang Miami Heat pinaagi sa pag-iskor og daog, 112-102. Gipilde sa Houston Rockets ang Memphis Grizzlies, 105-96, ang L.A. Clippers milubong sa Orlando Magic, 114-86, gilubong sab sa Toronto Raptors ang Utah Jazz, 123-104 ug ang Dallas Mavericks nakaipsot sa Milwaukee Bucks, 107-105. (BANAT PALARO)
- Latest
