Adlawan Rider of the Year sa Man and Machine Supercross
CEBU, Philippines – Ang Cebuano teen riding sensation nga si Jon Eleazar ‘Jon-Jon’ Adlawan maoy gibayaw isip “Rider of the Year” human sa iyang pagdominar sa pro open division sa 2014 Man and Machine Supercross Series niadtong weekend didto sa Lipata, Minglanilla.
Si Adlawan, kinsa midaog sa nangaging mga lumba sa maong six-leg nationwide motocross series, mipilde nilang Rhowell ‘Bornok’ Mangosong sa Mindanao ug sa Sugbuanong si Jubenille Abellar.
Napilde hinuon si Adlawan atol sa final leg ni guest rider Deczi Blaz sa Hungary. Ang No. 1 sa Pilipinas nga si Glenn Aguilar nalandig sa ikatulong dapit.
Si Adlawan mao usab ang best rider sa pro lite class, samtang si Jacob Orbe sa intermediate class.
Si Denmar Supata midaog sa novice, si Risty Dela Calzada maoy nag-una sa beginners, samtang ang legendary Cebuano rider nga si Pepo Rubi naghari sa veterans A category.
Sila si James Doroy ug Roscel Gungob maoy labing maayo sa veterans B ug C, samtang si BJ Pepito miiskor og double-title sa mini ug peewee 65. Naghari sab si Shaun Peralta sa peewee 50, si Clinto Gualiza midaog sa local enduro, si Donkey Sanchez nanghawod sa open enduro ug si Israel Larido maoy hari sa underbone class. (BANAT NEWS)
- Latest
