PDBC, kimwa daog na sab sa Christmas League 2014
CEBU, Philippines - Daog na sab ang teams PDBC ug Kimwa batok sa tagsa-tagsa nilang kaatbang sa Power Dealer Basketball Club Christmas League 2014 niadtong Miyerkules sa gabii didto sa Kimwa gym sa barangay Subangdaku, Mandaue City.
Ang PDBC ni playing coach Arnold de Asis walay kaikog nga mipilde sa Flying-V, 78-65, samtang ang Kimwa milubong sab sa MSE, 65-52.
Sa maong kadaugan, ang PDBC ug Kimwa kasamtangang nagsawo sa liderato sa managsama nilang baraha nga 2-0.
Upat ka players ang miiskor og double figures alang sa PDBC, kinsa nakapanimaho sa ilang sayong kadaugan human molabaw og 14 puntos sa pagsugod sa fourth quarter.
Gipangulohan kini ni Jules Langres, kinsa miburak og 17 puntos, gisundan ni Pasaol Sayson sa iyang 13 puntos. Ang founder sa PDBC nga si Arnold de Asis mitimbre’g 12 puntos ug milangkat og pito ka rebounds, samtang si Mitchelle Matthew miabuno’g 10 puntos.
Sa laing bahin, sila si Weldy Soco ug Sheldon Gahi mibuhos 16 ug 12 puntos matag usa alang sa Kimwa, kinsa miblangko sa MSE, 16-0 sa nahabiling kuwatro minutos sa first period. Ang naungot nga iskor sa MSE nairog human sa three-pointer ni Juanito Belloso, 3-16. Mipasud og laing tres si Belloso aron makan-an ang labaw sa Kimwa ngadto na lang sa otso puntos, 10-18 paghuman sa first quarter. Apan ang Kimwa padayong mimanso og mga puntos hangtod nga naugkat nila ang muhon sa kadaugan.
Si Edwin Dejacto maoy nangu sa MSE nga mihakot og 12 puntos, samtang si Francis Palero miariya og 10 puntos.
Sa laing aksiyon, ang Toyota midaog batok sa Gold Musle Gym sa low-scoring game, 65-52.
Si Christian Parker miarangkada og 10 puntos aron pangulohan ang Toyota sa ilang una nga duwa ning maong liga nga gipaluyohan sa Saymer Merchandise nga gipanag-iya ni PDBC president Florentino Sayson.
Ang mga duwa gidumala nilang Arnold de Asis, Florentino Sayson ug Alner Mercado uban nilang Marlon Espante, Jorge Insila, Edward Escorial ug Yanie Apas. (BANAT NEWS)
- Latest
