Ma-knockout kaha?

CEBU, Philippines - Pipila ka oras gikan karon, magbinukbukay na sila si Filipino boxing icon Manny Pacquiao ug undefeated American Chris Algieri karong adlawa didto sa Cotai  Arena sa The Venetian Hotel sa Macau.  

Gibarugan ni Freddie Roach ang unang pamahayag nga aduna  gyu’y “knockout” nga mahitabo ug anaa sa iyang  “prized fighter” nga si Pacquiao ang tanan sa pagbalik niya’g saka sa ring.

Si Pacquiao modepensa sa iyang WBO welterweight  title batok sa challenger niining si Algieri.

Atol sa weigh-in, si  Pacquiao yano rang mikuha sa 143.8 lbs., samtang si Algieri nagkinahanglan pa og dugang oras aron mosulod  sa 144 lbs. weight limit.

Inilog si  Pacquiao  batok ni Algieri, apan ang mga fans  nagpaabot  og “knockout” nga kadaugan nga katapusan niyang nahimo niadto pang  tuig 2009.

Wala direkta nga misaad og knockout win si Pacquiao, apan mipasalig siya nga buhaton niya ang tanan alang sa usa ka kumbinsidong kadaugan.

“I’m excited to share my speed and bring back the early days of my boxing career. I’m having the hunger that I had when I was young,” matud pa ni Pacquiao.

Dugang inspirasyon ni Pacquiao  mao ang pagpilde og laing undefeated boxer sama sa batan-on nga si Algieri. Gawas nga bata, si Algieri nakapabor sab sa gitas-on.

“It’s an honor to fight undefeated guys like him (Algieri),” matud pa ni Pacquiao.

Sa iyang bahin, bisan pa og naglisud siya pagkuha sa timbang, si Algieri andam  ug misalig sa iyang abilidad nga mohimo og dakung surprisa karong adlawa pinaagi sa pagpilde sa legendary Pinoy boxer.

“I am ready. I have the talent and skills to do it,” matud pa ni Algieri. (BANAT NEWS)