Dagan alang sa kababayen-an giTAKDA
CEBU, Philippines - Ang Cebu 1 Zonta Club mopasiugda og mahinungdanong lumba alang sa pakigbatok sa mga pagpang-abuso sa kababayen-an.
Pagaulohan og “Run for Zonta Says No,” ang lumba himuon karong Nobiyembre 23 diha sa The Terraces sa Ayala Center-Cebu.
Ang Cebu 1 Zonta Club kabahin sa Zonta International, usa ka non-governmental global organization nga gilangkuban sa women executives ug professionals nga nag-alayon aron pagprotekta ug pagtabang sa mga kababayen-an.
Ang lumba nga gibahin ngadto sa 3K, 5K ug 10K categories, tinguha nga motigum og pundo alang sa pagtukod og center alang sa mga babaye, apil na ang bata nga biktima sa pagpang-abuso.
Gilauman nga 2,000 runners ang mosalmot sa lumba nga naglakip sa mga tinun-an gikan sa nagkadaiyang unibersidad dinhi sa Sugbo.Kapin sa P40,000 nga ganting salapi ang giandam alang sa mga mananaog sa matag kategoriya. Ang registration fee nagkantidad og P300 sa 3K, P400 sa 5K ug P500 sa 10K libre na ang race shirt, race bibs ug post-race refreshments. Mahimong magparehistro sa Cebu City Sports Center, Runnr Shop sa Ayala Active Zone, HP Store sa Cyberzone sa SM City-Cebu ug My Pet Station sa Tres Borces St. Mabolo. (FREEMAN)
- Latest
