Allied bag-ong kampiyon sa laba caging

CEBU, Philippines - Nakuha na gyud sa Allied team ang ilang gidamgo nga korona human midaog batok sa MCC-Larobis, 89-86 sa “knockout” finals sa Los Amigos Basketball Association (LABA) Commissioner’s Cup niadtong Lunes sa gabii didto sa Banilad Sports Center, Mandaue City.

Ang troika nilang Domingo Recto, Rowen Grafe ug Jeryl Bukiron nga parehong miiskor og double figures maoy responsabli sa dakung kadaugan sa Allied ni team owner Cris Martenito.

Si Recto mikadlit og 27 puntos aron maoy mangu sa kadaugan, si Grafe nga maoy miduslit sa unang nuybe puntos sa Allied miamot og 22 puntos, samtang si Bukiron midagkot og 15 puntos.

Sikit kaayo ang duwa gikan sa pagsugod nga miresulta ngadto sa 17 ka lead changes ug unom ka panagtabla. Samtang nagkahilis ang oras, nagkalami sab ang duwa, gani, tungod sa kahigpit sa aksiyon, walay  miangkon  og kadaugan hangtod nahurot ang oras.

Napugngan sa Allied ang star player sa Larobis nga si Canjo Echavez, apan nakahimo gihapon siya sa pagpangulo sa koponan human moposa’g 19 puntos.

Si Bryan Acusar mitikdol og 14 puntos, samtang si Arnel Asis mitimang og 11 puntos alang sa Larobis ni team owner Bax Larobis.

Sa laing aksiyon, ang Huskies ni team owner Dr. Raul Monteroyo midaog batok sa MS Motosuit, 102-89 aron maangkon ang ikatulong puwesto.

Gipangulohan ang Huskies ni Richard Madrid, kinsa mipabuhagay og 29 puntos, gisundan ni Richard Bathan nga adunay 25 puntos. Ang team owner nga si Dr. Raul Monteroyo mihimo sab og double figures pinaagi sa iyang 10 puntos.

Ang MS Motosuit ni LABA vice president for internal Lou Ornopia gipangulohan ni Albert Ramos sa iyang 16 puntos. Ang team owner/playing coach nga si Ornopia ug Noel Perolino mitampo’g 12 puntos matag usa, samtang sila si Loloy Son ug Jojo Jacalan adunay tag-10 puntos.

Misaksi sa maong duwa ang mga karaang miyembro sa LABA sama nilang Dennis Patindol, Teban Seno, Cesar Lee, kinsa maoy adviser sa grupo, commissioners Dodoy Rizane, Rudy Candelada ug King Celiz ug Arnold Pestaño.

Nagmalampuson ang liga pinaagi sa mga paningkamot ni LABA president Cris Ubas  ug iyang mga bise presidente  Gilbert Sebandal ug Lou Ornopia ug uban pang mga opisyales sa grupo.

Gipaluyohan sab kini ni  Banilad Brgy. Capt. Greg B. Yap ug sa iyang mga konsehales. (BANAT NEWS)