San Miguel 3-0 na
CEBU, Philippines - Sa pagpangulo sa kanhi MVP nga si Arwind Santos ug reigning MVP Junemar Fajardo, nabingwit sa San Miguel Beermen ang ikatulo nilang sunod-sunod nga daog dihang ilang gipanitan ang Barako Bull Energy Cola, 103-89, kagahapon didto sa Smart Araneta Coliseum.
Si Santos mibugwak og game-high 27 puntos, samtang ang higanteng Cebuano nga si Fajardo miiskor og 17 puntos ug milangkat og 10 ka rebounds aron pangulohan ang Beermen.
Sa maong kadaugan ang San Miguel ni coach Leo Austria mipwesto sa unang dapit sa standing uban sa Alaska Aces nga aduna usab 3-0 record.
Dili hinuon sayun ang maong kadaugan alang sa Beermen human sila gipakitaan og hugot nga depensa sa Barako Bull nga maoy milabaw sa halftime, 45-43.
Hinuon, nakabwelo ang San Miguel sa third period sa paningkamot ni Santos, Chris Lutz ug Marcio Lassiter aron itukod ang 63-53 nga labaw.
Apan inay magpadayun ilang momentum, nakaapas ang Barako Bull dihang hinay-hinay nilang nailog ang labaw. Ang tira ni JC Intal maoy mihatag og uno punto nga labaw sa Barako, 74-73, sa hinapos nga minutos sa duwa.
Napugos pagdoble sa ilang paningkamot sila si Santos ug Fajardo dihang sila ang midominar sa katapusang dos minutos alang sa 96-89 nga abante nga maoy nahimong yawi sa ilang kadaugan.
Ang kanhi San Miguel player nga si Denok Miranda maoy leading scorer sa Barako sa iyang 17 puntos, gisundan ni Intal nga adunay 12 puntos. (LPM)(BANAT NEWS)
- Latest
