Falcon mitabas sa nagkadinang daog sa Allied

CEBU, Philippines - Giputol  sa Falcon ang nagkadinang upat ka daog sa Allied pinaagi sa pagtusik og 111-109 nga kadaugan sa Los Amigos Basketball Association (LABA) Commissioner’s Cup 2014 caging niadtong  Lunes diha sa Banilad Sports Complex, Mandaue City.

Si Marcial Marturillas maoy nakaanghel  sa Falcon human niya mapasud ang krusyal nga tira sa himalatyong oras sa duwa. Si Marturillas miiskor og 19 puntos alang sa Falcon nga gibiyaan og 13 puntos, 58-45 sa nahabiling 1:25 sa third period.

Ang Falcon nakakuha sab og suporta gikan nilang Dodoy Dawal ug Rene Erana nga pulos mihungit og 14 puntos. Si Leonardo Lagaras mitampo’g 13 puntos, samtang ang team owner nga si Arnold Pestaño miamot og 12 puntos alang sa Falcon nga nagtangag og 4-3 nga baraha.

Pwerteng sikita sa maong duwa diin nagtabla  ang iskor sa maka-13 ka higayon.  Katapusang nagtabla ang duwa  sa iskor nga 99-all sa nahabiling 27 segundos sa wala pa dagita sa Falcon ang daog. Ang follow-up shot ni Marturillas sa sipyat ni Dawal gikan sa duha ka  free throws  maoy miselyo sa kadaugan.

Si Jeryl Bukiron maoy topscorer sa napildeng Allied nga mipabuhagay og 27 puntos, lakip na ang tulo ka 3-point shot, gisundan ni Domingo Recto nga adunay 24 puntos. Sila si  Rowen Grafe ug Gilbert Lesin mirehistro’g  20 ug 17  puntos alang sa 4-1 nga Allied ni team owner Cris Martenito.

Sa laing aksiyon, ang AC Troopers way puangod nga milubong sa Romgen sa iskor nga 122-95.

Gipangulohan ang kadaugan ni  Joel Cabahug nga miposa’g 32 puntos, gisundan ni Opong Englis sa iyang 21 puntos.  Si Yares mitikdol og 24 puntos aron pangulohan ang Romgen. Si Ben Mauro mitimang og 20 puntos, samtang ang team owner nga si Romeo Gastardo mitimbre’g 19 puntos lakip na ang unom ka triples. (BANAT NEWS)