Gonzales naluwas sa tie-break

CEBU, Philippines – Bisan napilde si Alphecca Gonzales ngadto ni Michael Gocotano sa final round, wala kini makaapekto dihang siya ang nahimong kampiyon sa 7th qualifying round sa Cebu Kiddies Championship nga gipasiugdahan sa School of Chess niadtong weekend didto sa School of Chess nga nahimutang sa ikaduhang andana sa Central Books Building sa dan P. del Rosario, ning siyudad.
Sila si Gonzales ug Gocotano gihulagway nga nagtabla  uban  nilang  Jerish Velarde ug James Francis Paraon paghuman sa 7-round Swiss system tournament nga pulos mimarka og 5.5 puntos,  apan si  Gonzales maoy nakakuha sa labing taas nga placing pinaagi sa superior tie-break output. Si Gocotano mipahiluna sa ikaduha nga dapit, gisundan nilang Velarde ug Paraon alang sa ikatulo ug ikaupat nga dapit.
Gumikan kay nasud nang daan si Gonzales  sa grand finals human maghari sa sayong bahin sa qualifying round, sila si  Gocotano ug Velarde miangkon sa duha ka pasaporte alang sa “Battle of Champions” sa Disyembre 27-29.

Makig-uban sila nilang James  Andrew Balbona, Duane Borgonia, Marphine  Mangubat, Jeremy Pepito, Chris Aldritz Pondoyo, Angel Naureen Bagano, Edsel Vosotros, John Lester Belano, Adrian Basilgo, Jeena Balbona, Krizal Gutang, Jave Peteros, Miguel Tequillo ug  Edelyn Vosotros.

Ang ikawalo ug final qualifying round gitakda sa Nobiyembre 22-23 diin tulo ka luna ang giandam.
Gawas sa  P5,000 nga ganting salapi ug tropeyo, ang grand champion malibre sab sa tanang galastohan sa biyahi sa 17th Dubai Open Chess Championship sa Abril sunod tuig didto sa Dubai, United Arab Emirates (UAE).  (BANAT NEWS)