Grafe nagmangtas na sab

CEBU, Philippines – Naghangad gihapon sa kamangtas ni Rowen Grafe ang Allied, kinsa way kukaluya nga mipupo’g daog sa Los Amigos Basketball Association (LABA) Commissioner’s Cup 2014 cagefest niadtong Biyernes  didto sa Banilad Sports Complex, Mandaue City.

Ang alas sa Allied nga si Grafe mikadlit og 30 puntos uban ang 11 ka rebounds aron maoy mangu sa kadaugan batok sa AC Troopers, 107-99.

Mao kini ang ikatulong  sunod-sunod ni Grafe nga ang iyang iskor miabot og 30 puntos.
Unom sab ka players ang miiskor og double figures alang sa Allied nga miabante og 10 puntos sa halftime, 27-17.
Si Gilbert Lesin mitampo’g 18 puntos, gisundan ni Domingo Recto sa iyang 14 puntos. Laing alas nga si Jeryl Bukiron miani og 13 puntos, samtang sila si Marlon Mendoza ug Adie  Cinco mitikdol og 10 puntos matag usa alang sa Allied ni team owner Cris Martenito nga midiga sa ilang 5-0 nga baraha.
Ang  AC  Troopers ni  SPO4 Dondon Coloscos gipangulohan  ni  Arnel  Ocier, kinsa mirehistro’g 18 puntos.
Nakatampo sab og daku ang idlas ug kusog  nga si Pedot Dakay pinaagi sa iyang 16 puntos. Si Opong Englis nga miiskor sa unang 11 puntos sa AC Troopers miabuno’g 14 puntos, samtang si Joel  Cabahug mitampo’g 10 puntos.
Ang  mga duwa gidumala ni LABA vice president for external ug Banilad barangay councilor Gilbert Sebandal.
Gipaluyohan sab kini sa Banilad Barangay Council ubos sa liderato ni Brgy. Capt. Greg B. Yap. (BANAT NEWS)