PLDT, Cagayan agawan sa No. 2
Laro Ngayon
(The Arena, San Juan City)
2 p.m. FEU vs RTU
4 p.m. Cagayan vs PLDT
MANILA, Philippines - Mag-uunahan ang Cagayan Valley at PLDT Home Telpad sa pagkapit sa mahalagang ikalawang puwesto sa pagpapatuloy ng Shakey’s V-League Season 11 Third Conference ngayong hapon sa The Arena sa San Juan City.
Ang dalawa ay magtutuos sa ikalawang laro dakong alas-4 ng hapon at ang papalarin ay maiuusad ang isang paa patungo sa Finals sa ligang inorganisa ng Sports Vision katuwang ang Shakey’s bukod sa ayuda ng Accel at Mikasa.
Pasok na sa championship round ang Army Lady Troopers sa 5-0 baraha habang magkatabla ang Lady Rising Suns at Turbo Boosters sa ikalawang puwesto sa 2-2 baraha.
Unang magkikita ang FEU Tamaraws at Rizal Technological University Blue Thunders sa men’s division sa alas-2 ng hapon.
Naunsiyami ang balak ng Lady Rising Suns na pigilan ang pananalasa ng Lady Troopers nang natalo sa limang sets, 22-25, 24-26, 28-26, 25-23, 13-15, noong Huwebes.
Nakitaan ng bangis ang mga Thai imports ng Cagayan na sina Saengmuang Patcharee at Amporn Hyapha matapos ang tig-22 puntos at ang dalawa ang paghuhugutan ng lakas ng koponan para palakasin ang planong hamunin ang Army sa kampeonato.
Umani rin ang Cagayan ng 25-17, 25-17, 27-25, panalo sa unang pagkikita laban sa Turbo Boosters.
Sasandalan ng PLDT ang 25-20, 25-15, 22-25, 16-25, 17-15, panalo sa Meralco Power Spikers para maitaas ang morale sa mahalagang labanang ito. (ATan)
- Latest
