Allied wala pay pilde sa LABA Commissioner’s Cup
CEBU, Philippines - Bugtong ang team Allied na lang ang pabiling nagbarog nga walay pilde sa Los Amigos Basketball Association (LABA) Commissioner’s Cup 2014 basketball tournament.
Ang Allied walay kukaluoy nga midemolis sa MCC-Larobis, 120-99 niadtong Miyerkules sa gabii diha sa Banilad Sports Complex, Mandaue City.
Gawas pa niana, ang Allied ni team owner Cris Martenito mao sab ang team nga nakabuling sa rekord sa MCC-Larobis ni Bax Larobis.
Dili na angay ikahibong, si Rowen Grafe mao na sab ang nangu sa Allied nga miiskor og 35 puntos uban ang walo ka rebounds.
Maayo sab kaayong nakaduwa si Danny Olmilla, kinsa mitimang og 14 puntos, sila si Jeryl Bukiron ug Marlon Mendoza mitikdol og 13puntos matag usa, samtang si Gilbert Lesin mitimbre’g 11 puntos.
Naglabaw og 13 puntos ang Allied sa second quarter, 40-37, apan gihinay-hinayan kini’g kitkit sa MCC-Larobis sa pagpangulo ni Dindo Aposaga, kinsa mikiat pag-ayo sa third period aron mailog ang labaw, 74-71 sa nahabiling 3:45 sa maong kuwarter.
Didto nagsugod ang hugot nga kumbati sa walay pildeng koponan, apan ang Allied maoy nakalahutay ug nailog pagbalik ang labaw. Samtang nagkagamay ang oras, nagkadaku sab ang labaw sa Allied ug gitapos nila ang duwa pinaagi sa 21 puntos nga kadaugan.
PUNTOS MATAG USA
ALLIED (120) – Grafe 35, Olmilla 14, Bukiron 13, Mendoza 13, Lisen 11, Recto 7, Miñoza 5, Lipon 4, Cinco 4, Delima 2, Crismart 1,Salonoy 1.
MCC-LAROBIS (99) – Chavez 22, Aposaga 19, Ouano 14, Niez 11, Pestaño 8, Acusar 8, Asis 7, Angcot 2, Rempojo 2, Gelbolingo 2,Larobis 2, Marbalo 1, Duhaylungsod 1. (BANAT NEWS)
- Latest
