Ms Motosuit Misutoy, 4-1 na sa laba cagefest

CEBU, Philippines - Miarangkada na sab ang MS Motosuit ug ilang gilubong ang  Romgen, 89-70 aron molansang sa ikaupat nilang daog sa nagkainit nga aksiyon sa Los Amigos Basketball Association (LABA) Commissioner’s Cup 2014 niadtong Miyerkules sa gabii didto sa Banilad Sports Complex, Mandaue City.

Si Albert Ramos miratsada’g 16 puntos, samtang sila si Jojo Jacalan ug Noel Perolino mihipos og 14 puntos matag usa alang sa MS Motosuit ni team owner Lou Ornopia.

Mipakita sab sa iyang  abilidad sa natad sa basketbol si LABA vice president for internal Lou Ornopia, kinsa mikadlit  og 11 puntos alang sa iyang koponang MS Motosuit nga nagsolo sa ikaduhang dapit sa standing bitbit ang 4-1 nga baraha.

Biya og kwatro puntos paghuman sa unang 10 minutos sa duwa, 14-18, apan ang MS Motosuit nakapanagang sa second period diin miratsada sila’g 30-14 run aron ilogon ang tiempo sa duwa, 44-32 sa  halftime. Nahuptan nila ang momentum hangtod nga naangkon ang 19 puntos nga kadaugan.

Tulo ka Romgen players ang miiskor og double digits sa pagpangulo ni Saladua, kinsa misansan og 19 puntos.  Sila si Arnel Colanse ug Ben Mauro nagkumboya’g 24 puntos alang sa napildeng Romgen.

Ang  liga sa LABA sa pagpangulo sa ilang presidente Christopher ‘Cris’ Ubas gipaluyohan sa  Banilad Barangay Council ubos sa liderato ni Brgy. Capt. Greg B. Yap.

Ang mga duwa gidumala ni LABA vice president for external ug Banilad barangay councilor Gilbert Sebandal.

Sila si Rudy Candelada ug Cesar Lee maoy club advisers.

PUNTOS MATAG USA

MS MOTOSUIT (89) – Ramos 16, Perolino 14, Jo. Jacalan 14, Ornopia 11, Limosnero 6, Pestaño 6, Je. Jacalan 6, Ygonia 4, Son 4, Labador 4, Seno 2, Pestaño 2.

ROMGEN (70) – Saladua 19, Colanse 14,  Mauro 10, Ygerger 8, Surban 8, Diola 5, Yares 4, Gastardo 2.