UV Lancers nakaipsot sa USJ-R jaguars sa PCCL

CEBU, Philippines - Gipapas sa University of the Visayas (UV) Green Lancers ang ilang 11 puntos nga biya didto sa second period aron moiskor og usa ka palito nga kadaugan batok sa University of San Jose- Recoletos (USJ-R) Jaguars,  56-55  sa Vis-Min regional championship sa Philippine Collegiate Champions League (PCCL) kagabii didto sa Cebu Coliseum.

Gihangop sa Lancers ang pagbalik didto sa ilang team sa ilang kanhi import nga si Steve Cedrick Akomo. Si Akomo misipyat sa iyang baby hook, apan nakabawi  kini  pinaagi sa iyang split charities aron hatagan ang Lancers og uno puntos nga bentaha, 56-55 sa nahabiling 17.3 segundos sa duwa.

Ang Jaguars naglabaw  sa katapusang higayon sa iskor nga 55-53 human sa duha ka free throws ni Mark  Labares, apan napatabla kini ni Francisco Arong, sa nahabiling 52 segundos.

Si Akomo, kinsa wala makaduwa sa Cebu Schools Athletic Foundation, Inc. (CESAFI), mao lang ang bugtong player sa UV Green Lancers nga  nakahimo’g double figures pinaagi sa 11 puntos.

Silang Kevin Villafranca ug James Regalado maoy nangu sa Jaguars sa ilang 19 ug 11 puntos matag usa.

Ang Jaguars napilde sab sa Lancers sa ilang sangka alang sa ikatulong puwesto sa 14th season sa CESAFI.

PUNTOS MATAG USA

UV (56) – Akomo 11, Manzo 9, Perolino 9, Arong 8, Napao 7, Segumpan 6, Soliva 4, Santillan 2.

USJ-R (55) –  Villafranca 19, Regalado 11, Labares 7, Galvez 5, Suano 5, Nzuzi 4, Catipay 2. (BANAT PALARO)