Tillor, Balongcas daog sa Milo Marathon

CEBU, Philippines – Taliwala sa kapin 26,000 ka mga runners nga nanagan, sila si seasoned runner Noel Tillor ug Roselyn Balongcas maoy labing dakung mananaug human sila nag-una sa 21K half marathon race kagahapon sa 38th National Milo Marathon Cebu leg didto sa Cebu City Sports Center.

Si Tillor kinsa suki na sa mga lumba dinhi sa Sugbo maoy misakmit sa men’s elite title dihang milabang siya sa finish line sud sa usa ka oras, 13 minutos ug syete segundos.

Nagsunod ni Tillor si Jerry Adap sa oras nga 1:15:17, samtang si Robert Daang misakmit sa ikatulong dapit sa oras nga 1:17:38.

Sa iyang bahin si Balongcas nakahigayun na gyud pagpakita sa iyang abilidad human sa pipila ka tuig niya isip running enthusiasts dihang migawas siya nga reyna sa women’s elite sa oras nga 1:40:51.

Mipwesto sa ikaduhang dapit sunod ni Balongcas ang laing beterana nga si Christy Sevilleno-Tutor sa oras nga 1:49 ug ang ultramarathoner nga si Sandra Soliano mitungtung sa ikatulong dapit sa oras nga 1:49:54.

Gawas sa kadaugan sa premier division, sila si Tillor ug Balongcas mao usab ang mangulo sa mga Cebu runners nga mi-qualify sa 42K National Finals nga gitakda sa Disyembre didto sa Manila.

Sa 10K category, ang Kenyan nga si Isaac Simat maoy nag-una sa oras nga 33:43 batok sa mga Sugbuanon nga sila si Prince Joey Lee (34:55) ug Riez Enriquez (36:08).

Si Keisha Mae Delechos maoy midaog sa women’s class sa oras nga 44:50 uban sa iyang mga runner-ups nga sila si Jhean Andrin (51:18) ug Criselda Alianec (51:41) sa ikaduha ug ikatulong dapit.

Ang top three finishers sa 5K men’s mao sila si John Daryl Manos (15:51), Ivan Santos (16:27) ug Ronilo Gabilan (16:35), samtang sila si Lovely Fe Andrin (20:07), Sarale Cuizon (20:15) ug Lynle Cardenas (20:28) ang tulo sa mga labing paspas sa women’s class.

Midaug usab sa 3K open sila si Adon Almento sa oras nga 11:08 ug si Cherry Andrin sa oras nga 11:17.

Sa laing bahin ang mga organizers sa Cebu leg nagmaya sa hapsay ug malampusong pagpahigayun sa ika-38 edisyon sa usa sa labing dugay ug labing dakung lumba sa Sugbu.

Si Milo Sports Executive Andrew Neri miingon nga kun mahukman na nga ipahigayun na usab sa laing dapit sa nasud ang National Finals, ang Sugbu ang numero unong kandidato nga sunod mo-host sa 42K Finals. (BANAT NEWS)