SHS-Ateneo kampiyon na sab

CEBU, Philippines – Nagpabiling kalmado ang Sacred Heart School-Ateneo de Cebu (SHS-AdC) Magis Eagles bisan pa sa tumang presyur nga gipahamtang kanila sa University of the Visayas (UV)  Baby Lancers aron moiskor og 73-66 nga kadaugan sa ilang knockout match kagabii ug ingon man sakmiton ang titulo sa juniors division sa 14th Cebu Schools Athletic Foundation, Inc. (CESAFI) basketball tournament  didto sa Cebu Coliseum.

Giusikan sa Magis Eagles ang ilang duha ka dagkung labaw, 26-5 sa uwahing bahin sa first quarter ug  54-30 sa nahabiling  tres minutos sa third period.  Apan wala sila mahulga sa rally sa Baby Lancers ug labaw nang wala sab sila magkaguliyang dihang misikit ang Baby Lancers ngadto sa tres puntos, 67-64  sa nahabiling 1:38  sa duwa.

Ang Magis Eagles mibawos og kuwatro puntos aron inaton ang ilang labaw, 71-64 sa wala pa ang duha ka free throws ni Felixberto ‘Janjan’ Jaboneta alang sa final score.

Bisan og nabiyaan og daku sa first period, ang Baby Lancers walay  puas  sa  ilang pag-ataki ug ilang  na-outscored ang Magis Eagles sa second period, 16-9 diin gitapos pinaagi sa buzzer-beating triple ni John Carl Escalona ubos sa midcourt aron  makan-an ang labaw ngadto  sa 12  puntos, 23-35  sa halftime.

Ang Baby Lancers mi-outscored na sab sa Magis Eagles sa third quarter, 22-17 ug sa kinatibuk-ang fourth period, kanunay silang misikit, apan wala sila makasustiner.

“It’s a great championship for us,” matud pa ni SHS-AdC President Fr. Manuel Uy, S.J.

Matud pa ni Baby Lancers coach Delfin Pepito, Jr. nga ang grabeng pangataki sa Magis Eagles sa first period maoy nakaguba sa ilang duwa.

Daw haum ang gipamulong ni Pepito tungod kay ang ilang bigman nga si Theo Joshua Flores wala makaiskor sa kinatibuk-ang first quarter ug igo lang mitapos sa iyang otso puntos. Ang laing bigman sa UV nga si Jan Dominic Morre na-ejected sa nahabiling 3:19 sa first period  human  matawagi og duha ka unsportsman-like fouls diin ang Magis Eagles naglabaw, 16-3.

Si Jaboneta, kinsa maoy napiling regular season MVP, miiskor og 16 puntos apan  si Joshua Sinclair maoy topscorer sa iyang 27 puntos. Maayo sab nakaduwa si Jose Piero Dominic Longa, kinsa midugang og 21 puntos lakip ang lima ka triples.

Silang Orlan Wamar ug Escalona maoy nangu sa Baby Lancers sa ilang 21 ug 20 puntos matag usa. Wala makapugong sa iyang luha si Escalona tungod sa kaanugon sa ilang paningkamot.

Si Escalona nalakip sa Mythical Five uban  nilang Sinclair, Flores ug John Byrlle  Bahio sa University of Southern Philippines Foundation. (BANAT NEWS)