Calambua series mosikad na karon
CEBU, Philippines - Magpalabwanay na sa ilang abilidad ang kapin sa 100 ka riders lukop nasud sa fifth leg sa 2014 MS Motosuit Motocross Series nga uloha’g “Calambua Motocross Challenge” nga moarangkada karong adlawa didto sa Calambua racetrack sa San Remigio sa amihanang bahin sa Sugbo.
Ang nag-unang kandidato alang sa “Rider of the Year” nga si Jonjon Adlawan maoy mangu sa mga elite riders nga naglakip sab nilang Jubenile Abellar, Dondon Yuson, Scot Remy sa Dumaguete ug Windsor Famorca sa Guimaras sa pro open category.
Lakip usab sa mga kategoriya nga tigian mao ang mini 60cc ug 85cc, beginners, local enduro, open enduro, executive A, B ug C, intermediate ug expert.
Sila si John Flores, Cyril Tariman, JC Obligado, Dongkey Sanchez uban ang mga batan-on apan masaarong riders nga pangulohan ni BJ Pepito, Charisse Lauron ug Jeanette Connock Olanda mopakita sab sa ilang abilidad.
Moapil sab ang riders gikan sa Sel-J Racing Team sa Manila ug sa ubang dapit sa Visayas ug Mindanao region.
Atol sa lumba, ang Yamaha Motors Philippines Inc. molusad sa ilang duha ka top-grade motorbikes -- ang XTZ 125 ug Serow 250.
Ang Yamaha mopahulam og 12 ka units ning maong motorbikes ngadto sa mga riders sa off-road world category nga gilauman nga mahimong main attraction sa charity event nga gipaluyohan sab sa CST Motorcycle Tire, F & FO Motor Parts, RMO Motor Parts, JCO Motor Parts, New MS Apartelle,Prospeed, Motomaze, Ljun Motorparts, N Style Motor Parts, Speed-up Motor Parts, Diosdado Navarez ug ang Lauron Refrigeration and Airconditioning. (BANAT NEWS)
- Latest
