Baby Lancers nakaipsot
CEBU, Philippines - Napakgang sa University of the Visayas (UV) Baby Lancers ang mainitong rally sa University of Southern Philippines Foundation (USPF) Baby Panthers sa uwahing bahin sa fourth period aron moiskor og 69-60 nga kadaugan sa second round sa juniors division semifinals sa nagpadayon nga 14th Cebu Schools Athletic Foundation, Inc. (CESAFI) didto sa Cebu Coliseum.
Milabaw ang Baby Lancers og 14 puntos, 61-47 sa nahabiling 5:10 sa fourth period human sa three-pointer ni Ramish Alforque. Dihang migukod ang Baby Panthers ngadto na lang sa siyete puntos, 54-61 sa lay-up ni John Alocillo, mibomba og sagunson duha ka triples si Raul Jancork Cabahug, kinsa wala makatiwas og duwa dihang napiang siya sa katapusang 41.9 segundos.
Kanunay unta sikit ang duwa dihang igo lang milabaw ang Baby Lancers og kuwatro puntos sa halftime, 25-21.
Didto na sa second half nagmangtas ang Baby Lancers ug walay nakapugong kang Orlan Wamar, kinsa nagpatuyang og pamuntos pinaagi sa lay-up ug duha ka three-pointers aron pangulohan ang opensa sa iyang 23 puntos.
Si Cabahug midugang og 14 puntos, upat niini ang three-pointers.
Nabalikan na sab unta sa iyang init nga kamot si Ain Obenza, apan uwahi na kaayo siyang nakahimo’g mga puntos kay medyo demalas siya sa first half. Bisan pa niini, nakahimo lang gihapon siya sa pagpangu sa Baby Panthers dihang miiskor siya og 18 puntos.
Si Clyde Drexley Avancena miamot og 13 puntos, samtang si Alocillo miabuno’g 12 puntos.
PUNTOS MATAG USA
UV (69) – Wamar 23, Cabahug 14, Escalona 8, Flores 8, Schaub 6, Alforque 5, Morre 3, Verano 2.
USPF (60) – Obenza 18, Avancena 13, Alocillo 11, Carbajosa 8, Bahio 7, Archival 2. (BANAT PALARO)
- Latest
