Rodel "Pitbull" Valisado mipatug ni Padillo
CEBU, Philippines – Nagpungasi nga right overhand ang gipatama ni Rodel ‘Pitbull’ Valisado ngadto sa apapangig ni Mike ‘Tiger Wolves’ Padillo aron matumba kini sa first round atol sa ilang sangka sa ‘Bakbakan sa Sugbo 2’ kagahapon didto sa Cebu City Sports Institute.
Sa maong kadaugan, si Valisado sa Unified Mixed Martial Arts aduna nay amateur Mixed Martial Arts record nga 2-1 human usab sa iyang submission nga kadaugan batok ni Junrey Soquite sa miaging buwan.
Gipaundang usab sa first round ni Dodong ‘Tiger’ Jagape sa Bohol Top Team si John Edu ‘Excalibur’ Torbiso’ sa Durex MMA sa Lapu-Lapu City.
Midaog usab ang mga pambato sa Yaw-Yan ArDigma Simaron nga sila si Dennis ‘Tamaraw’ Lumanta, Ken ‘Simaron’ Caniga ug Josh ‘Buffalo’ Ybañez.
Si Lumanta midaog pinaagi sa unanimous decision batok ni Rolly ‘Pretty Boy’ Dalen sa Fitma MMA, samtang sila si Caniga ug Ybañez pulos mikulata nila ni Benedict ‘Little Warrior’ Torbiso ug Nino ‘Little Giant’ Francisco sa first round pa lang.
Ang maong torneyo nga gipasiugdahan sa Cebu City Sports Commission uban sa Yaw-Yan ArDigma Cebu Martial Arts Inc. laraw nga makakaplag og amateur fighter nga adunay potensyal nga morepresentar sa umaabot sa Sugbo sa mga regional tournaments. (BANAT NEWS)
- Latest
