Baby panthers nakaipsot

CEBU, Philippines - Midaog  ang  University of Southern Philippines Foundation (USPF) Baby Panthers batok sa Cebu Institute of Technology University (CIT-U) Wildkittens, 72-67  juniors semifinals  sa 14th Cebu Schools Athletic Foundation, Inc (CESAFI) kagahapon didto sa Cebu Coliseum.

Naggubat og tres silang Ain Obenza sa USPF ug Joshua Manatad sa CIT-U didto sa fourth period diin pareho sab silang

mihimo’g otso puntos ug adunay tagduha ka three-pointer sa maong  kuwarter.

Ang Baby Panthers nagkinahanglan lang sa three-pointer ni Obenza ug three-point play ni John Alocillo aron moinat ngadto sa singko puntos nga abante, 59-54.  Apan  misukli dayon sab si Manatad og kaugalingon  singko puntos aron mailog ang labaw, 77-67 sa nahibiling 1:52  sa duwa. Mao na sab hinuon kadto ang katapusang paglabaw sa Wildkittens kay miarangkada man ang  Baby Panthers.

Si Obenza maoy nangu sa USPF sa iyang 18 puntos, samtang si Alocillo midugang og 17 puntos. Silang Clyde Drexley Avancena ug John Brylle Bahio mitimbre’g 14 ug 12 puntos matag usa.

Ang CIT-U, kinsa mitapos sa first round bitbit ang 0-3 nga baraha gipangulohan ni Justin Jules Langres pinaagi sa iyang 21 puntos, gisundan ni Manatad nga adunay 17 ug Jasper Berezo sa iyang 10 puntos.

Wala makaduwa alang sa Wildkittens si Jeroel Pedrosa kay miserbisyo  sa iyang  one-game suspension tungod kay na-ejected siya atol sa ilang duwa batok sa University of the Visayas (UV) Baby Lancers  niadtong Huwebes.