Jaca hari sa 23rd Erne Jawad table tennis
CEBU, Philippines – Gipilde ni Val Stephen Jaca ang iyang teammate nga si Dannel Jay Tormis aron maghari sa premier men’s open sa 23rd Erne Jawad Memorial Table Tennis Cup sa miaging gabii diha sa Cebu City Sports Center (CCSC).
Ang garbo sa University of Cebu (UC) nga si Jaca miposte og 3-0 nga kadaugan batok ni Tormis sa men’s open finals.
Si Mark Jimenez sa Lopue Table Tennis Association (LOPTTA) nga nagbasi sa Bacolod miangkon sa ikatulong dapit.
Ang tandem nilang Jaca ug Tormis mitapos sa ikatulo sa men’s open team finals nga gidominar sa Table Tennis Association of North District pinaagi sa pagpilde sa OPTTA, 2-1 sa finals.
Si Emy Rose Dael mitunol sa LOPTTA og double championship sa women’s open ug under-18 division. Nidominar siya sa women’s open final batok ni Jerny Kaye Pepito ug Elona Dane Tormis, milandig sa ikatulo.
Ang ikaduhang korona ni Dael nakuha kortesiya sa girls’ 18 human nidaog batok ni Angela Borbon, samtang si Jeramae Saromines miokupar sa ikatulo.
Sa boys’ 18, si Francis Bendebel sa UC mao sab ang nanghawod batok ni Steven Gonzaga sa Royal Paddle, samtang laing UC player nga si Steven Resos napunta sa ikatulo.
Ang LOPTTA miharos sab sa under-13 team event dihang ang ilang Team A mipukan sa City Central alang sa unang dapit.
Sa “liha” competition, si Glen Jacalan mao ang naghari pinaagi sa pagpilde ni Berto Bas. (BANAT NEWS)
- Latest
