Juniors semis sugdan karon

CEBU, Philippines – Human giharos ang elimination round, ang nakapahuway  og maayo nga Sacred Heart School-Ateneo de Cebu (SHS-AdC) Magis Eagles, mobalik na’g taak sa korte dihang ilang sangkaon ang fourth seed Cebu Institute of Technology-University (CIT-U) Wildkittens sa pagsugod sa  semifinals sa juniors division sa 14th Cebu  Schools Athletic  Foundation, Inc. (CESAFI) basketball event karong adlawa diha sa Cebu Coliseum.

Sa laing bahin, ang  No. 2 seed University of the Visayas (UV) Baby Lancers makigbatok sa No. 6 seed  University of Southern Philippines Foundation (USPF) Baby Panthers, kinsa nakasud  sa semis  pinaagi sa pagpalagpot sa No. 3 University of San Carlos (USC) Baby Warriors.

Daghan kaayo’g mga kasaligang pambato  ang  Magis Eagles nga magpamatuod nga mahimo nilang depensahan ang ilang titulo nga naangkon niadtong 2012.

Naglakip  kini  sa  beteranong  si  Janjan Jaboneta  ug nilang Zach Lance Eden Huang, Niño Araw-araw, Joseph Mayol, Jose Pierro Dominic Longa, Joshua Sinclair, Kevin Brian Johnson, Steven Co ug Adrison Gaviola.

Sa laing bahin, ang Wildkittens magsalig  nilang Justin Jules Langres, Jasper Berezo, Jeroel Pedroza, Joshua Philip Manatad, Vince Bradley Hapin, Kevin Plaza ug Romy Christian Faunillan.

Sa laing aksiyon, ang Baby Lancers, kinsa igo lang midaog og singko puntos batok sa Baby Panthers sa elimination, 61-56  mosalig sa liderato ni skipper  John Carl Escalona uban nilang Orlan Wamar, Theo Joshua Flores, Raul Jancork Cabahug, James Eduard Zenarosa, Arkins Loreto, Ramish Alforque ug Samuel Schaub.

Ang Baby Panthers maghangad sab sa ilang mga sinaligan nga silang Ain Obenza,  John Ryelle Bahio, Dennis Archival, Carl Carbajosa, Cylde Drexley Avancena ug ang top point guard  nga si John Alocillo. (BANAT NEWS)