Portmen ug Rollway-Petracorta nagtabla

CEBU, Philippines – Pareho na karong naghupot og 3-0 win-loss record ang Customs Portmen ug ang Rollway-Petracorta Brokers human ilang gipanglubong ang managlahing kaatbang sa nagpadayon nga 3rd BOC-CIPU Friendship Cup sa miaging adlaw didto sa barangay Tinago gym, ning dakbayan.

Yanong gilubong sa Customs Portmen ni Boodie Monteno ang CEI, 96-76 kaniadtong Martes samtang mikulit sa una nilang daog sulod sa duha ang Transwise dihang ilang gipukan ang Customs Task Force, 104-91.

Kaniadtong Miyerkules, gidabo-dabohan sa Rollway-Petracorta ni coach Larry Villanil ang Global Carrier, 85-60 samtang midaog ang Lao Brokers batok sa Avenido Brokers, 88-75.

Giuswag hinuon ang duwa tali sa MP Brokers batok sa MCWD kagahapon tungod sa dautang panahon nga dala sa bagyong Mario nga miresulta og pagbaha sa mga kadalanan dinhi sa dakbayan.

Unom ka players sa Customs Portmen ang mibahug og double figures samtang duha lang sa habig sa CEI kinsa adunay 1-1 nga baraha.

Sa laing bahin, si Takloy Moral maoy nangu sa Rollway sa iyang 19 puntos aron hatagan sa ilang ikatulong pilde ang Global Carrier. (BANAT NEWS)