Team Voltaire naghari sa ronda Futsal
CEBU, Philippines – Usa ka halandumon ang kadaugan sa Team Voltaire sa Futsal (indoor football) ning tuiga dihang sila ang nidaog isip kampiyon sa premiere men’s open division didto sa Ronda sa miaging adlaw.
Gipangulohan ni Voltaire Montebon, ang Team Voltaire mipasulabi sa ilang katakus batok sa Badian FC sa final, 6-1.
Ang Team Voltaire misilhig sa tanan nilang mga duwa sa elimination round ug nasustinihan nila ang momentum uban ang 7-2 nga demolisyon batok sa Titans United aron moabante sa final batok sa Badian FC, kinsa nakasud sab sa finals human gipalagpot ang Moalboal FC, 5-1.
Sa finals, ang Team Voltaire maoy mikontrolar sa duwa ug igo lang nila gipaiskor og uno punto ang Badian FC.
Gawas ni Montebon, laing naka-goal alang sa Team Voltaire mao sila si Jan Michael Flore, Vince Dionela ug Ronel Saranilla.
Sa laing bahin, ang Titans United mipugnit og 3-2 nga daog batok sa Moalboal FC sa ilang duwa alang sa ikatulong dapit.
Sa ladies open, ang Talisay FC midaog batok sa Alegria sa “best-of-three” showdown. (BANAT NEWS)
- Latest
