Aguelo Singwangcha miangkon sa ABF title
CEBU, Philippines – Usa ka impresibong ninth round TKO ang gihimo ni Aguelo A. Singwangcha batok ni Bonnie Makiling aron masakmit ang Asian Boxing Federation super featherweight title niadtong miaging gabii sa main event sa ‘Pinaksitay sa Talisay’ fight card didto sa Talisay City Sports Complex.
Usa ka gera ibabaw sa ring ang nahitabo tali sa duha ka boksidor, apan nakapabor si Singwangcha tungod kay mas daghan ang power punches nga iyang gipasud nga mipaluya ni Makiling kinsa wala na mipadayun pa sa pagsugod sa ninth round dihang gipaundang ni ring physician Jose Unabia ang away.
Mipakita og kaisug si Makiling, apan daw dili niya mapugngan ang bangis nga atake sa Noy Pacing Flores Gym boxer kinsa mas nakapasulod og mga limpyong kinumo nga kapila mitay-og sa Bukidnon boxer.
Sa maong kadaugan, si Singwangcha mipalambo sa iyang record ngadto sa 22-10, 14KOs, samtang si Makiling nakatilaw sa iyang ikapitong pilde sa 12 ka away.
Gawas ni Aguelo, laing boksidor ni Thai boxing patron Naris Singwangcha nga midaog mao sila si Canoy J. Singwangcha, Boyose A. Singwangcha, Valero G. Singwangcha ug Tabanao J. Singwangcha.
Si Canoy midaog pinaagi sa unanimous decision batok ni Ryan Bajala, samtang si Boyose milupig usab sa puntos ni Jaime Barcelona.
Gipatumba ni Valero si Arlon Batingal sa ika-46 segundos sa 4th round, samtang si Tabanao milampos pagpilde ni Jhoas Aparecio pinaagi sa unanimous decision. (BANAT NEWS)
- Latest
