Labing bata nga rider maoy 'star' sa MS Motosuit TV special

CEBU, Philippines - Bisan pa sa linghod niyang pangedaron, apan ang singko anyos nga si Jeanette Connock Olanda kursonada na kaayong moapil sa motocross.

Nakadapit ni Jeannette pag-apil sa motocross mao ang iyang amahan nga si  Warren Wright Olanda,  kinsa nakampiyon sab sa maong matang sa paugnat sa kusog.

Ang nakaayo ni Jeannette kay wala kaayo siya mokuwenta’g daog. Ang importante alang kaniya nga makapakita sa iyang  riding skills matag kompetisyon nga iyang salmotan.

“Bahala og way trophy, it doesn't matter to me. Malipay naman lang ko nga maka-apil og lumba ug mapakita nako ang akoang riding skills,"  matud pa ni Jeanette,  kinsa nalakip sa Top 10 sa ilang klase sa St. Catherine’s College sa Carcar City. "I make it sure nga bisan sige ko og apil lumba, wala pud nako pasagdii ang akoang studies kay para nako mao na ang labing importante.”

Ang garbo sa Sibonga, Cebu nga si Jeannette unang miapil og lumba atol sa Kopiko Supercross Series  niadtong Pebrero didto sa South Road Properties (SRP) diin nahimutang siya sa ikatulong dapit sa female category.

Naapil sab siya sa top three sa women’s ug peewee 50cc class atol sa first ug third legs sa 2014 MS Motosuit Motocross Series nga gipasiugdahan ni business-sportsman Lou Ornopia.

Si Jeannette mopaambit sa iyang kasinatian sa motocross sa ikawalong episode sa MX-RLS (Motocross Rider Life Story), ang bag-ong segment sa MS Motosuit Motocross TV series nga makita sa CCTN 47 matag Sabado gikan  sa alas-10 hangtod sa alas-10:30 sa buntag.  Ang replays makita matag Domingo gikan sa alas-10:30 hangtod sa alas-11 sa gabii.