CIT-U Wildkittens abante sa semis
CEBU, Philippines – Talagsaong matang sa duwa ang gipakita sa fourth seed Cebu Institute of Technology-University (CIT-U) Wildkittens aron ilang mapalagpot ang fifth seed University of Cebu (UC) Junior Webmasters, 78-67 sa quarterfinal round ug aron sab moabante sa semifinals sa 14th Cebu Schools Athletic Foundation, Inc. (CESAFI) basketball event kagahapon didto sa Cebu Coliseum.
Naka-rally unta ang UC, apan wala nila matangtang ang ilang 21 puntos nga biya, 54-75 nga may singko minutos pa ang nahibilin sa fourth period.
Ang labing duol nga nahimo sa UC mao ang paglahap sa labaw ngadto na lang sa 11 puntos, 64-75 sa katapusang 45 segundos .
Mas hugot nga depensa maoy gipakita sa Wildkittens, kinsa mao sab ang midominar sa rebounding.
Si Joshua Philip Manatad maoy nangu sa Wildkittens nga miposa’g 22 puntos nga pulos gikan sa first half. Si Justin Jules Langres mikabkab og 19 puntos alang sa Wildkittens samtang si Jasper Berezo mitampo’g 15 puntos ug si Kevin Plaza adunay 10 puntos.
Ang Junior Webmasters gipangulohan sa ilang leading scorer nga si Darrel Shane Menina, kinsa mibahog og 25 puntos, gisundan nilang Rico Quiamco Jr. ug Richestel Isla sa ilang 11 ug 10 puntos matag usa. (BANAT NEWS)
- Latest
