Laba Comm’s Cup gibuksan na

CEBU, Philippines -  Gihimo ang pormal nga pagbukas sa Los  Amigos Basketball  Association (LABA) Commissioner’s Cup 2014 cagefest pinaagi sa usa ka salo-salo ug mga kalingawan niadtong Biyernes sa gabii didto sa Banilad Sports Complex sa barangay Banilad, Mandaue City.

Apan ang game proper unya pa sugdan sa Septiyembre 29, 2014 diin walo ka partisipanteng koponan moduwa.

“Unya pa namo sugdan ang duwa, hatagan una og higayon ang mga team nga makapraktis bali’g duha ka semana,” matud pa ni Banilad barangay councilor Gilbert Sebandal, kinsa mao sab ang vice president for external sa LABA.

Mangulo sa walo ka koponan nga mopakita’g aksiyon mao ang 2014 President’s Cup champion AC Sports ni team owner SPO4 Dondon Caluscos, Allied ni Cris Martenito, LABA Lancers ni Christopher Ubas, MS Motosuit ni Lou Ornopia, Huskies ni Dr. Raul Monteroyo, Falcon ni Arnold Pestaño, Romgen nilang Romeo Gastardo ug Richard Sanchez ug ang Larobis ni Paks Larobis.

Ang liga mosubay og single round robin format diin ang top four teams moabante sa crossover semifinals. Ang mga modaog maoy mag-abot sa “knockout” finals, samtang ang mangapilde magsangka alang sa ikatulong dapit.

Ganting salapi ug tropeyo ang nagpaabot sa top performing teams sa maong liga nga gipasiugdahan sa LABA ubos sa ilang president nga si Christopher Ubas.

Gawas ni Ubas, laing  mga opisyal sa LABA naglakip nila ni Banilad barangay councilor Gilbert Sebandal (vice president-external), Lou Ornopia (vice president-internal), Jonathan Salonoy (secretary), Richard Jordan (treasurer), Ben Auman (PRO) ug Glenn Rostata (sgt. at arms).

Sila si Dodoy Rizame ug Rudy Candelada maoy chairmen, samtang ang ilang mga miyembro mao silang Joel Magale, King Celiz, Jeryl Bukiron ug Tony Alcover.

Ang club advisers mao silang Cesar Lee ug Rudy Candelada.

Ang tinuig nga liga hugot sab nga gisuportahan ni Banilad Brgy. Capt. Greg Yap ug sa iyang mga konsehales ilabi ni Hon. Gilbert Sebandal,  ang  chairman  sa committee on sports. (BANAT NEWS)